Абазатә театр атеатралтә қәгылара «Анапаҿы иаагам ауапа» («Непокоренная бурка») мҩаԥысит Гагра ақалақь аҿы.

19.Цәыббра.2025

Абазатә театр атеатралтә қәгылара «Анапаҿы иаагам ауапа» («Непокоренная бурка») мҩаԥысит Гагра ақалақь аҿы.

Аҟәа. Цәыббрамза 18, 2025 шықәса. Аԥсныпресс. Аҳәынҭқарратә арепсубликатә абазатә драматә театр цәыббрамза 18 рзы Гагра ақалақь, Томас Кәакәасқьыр ихьӡ зху акультура Аҩны аҿы Ельдар Агачев иқәиргылаз атеатралтә қәгылара «Анапаҿы иаагам ауапа» («Непокоренная бурка») ала иқәгылеит.

Ақәыргыламҭа аҿы ауапа абазаа рыԥсадгьыл ахь ирымоу хамеигӡарыла абзиабереи аҵеи иуалԥшьа анагӡара азхиареи символра ауеит.

Ақәыргыламҭа атема хадақәа – апатриотизм, аидгыларахь ааԥхьара, иара убас Аԥсадгьыл аҿаԥхьа аҭакԥхықәара анагӡара.

Акәашареи амузыкеи апоезиеи рбызшәала артистцәа ахәаԥшыҩ изеиҭарҳәеит Аԥсадгьыл ахь абзиабареи аибашьраан ажәлар ирхыргаз амыҟәмабарақәа рзы агәхьааи.

Аспектакль иалахәуп артистцәа: Хужев Аббас, Хужева Лиудмила, Каблахова Диана, Цеков Асланби, Ниров Мурадин, Копсергенов Зураб, Цеков Али, Агачев Ельдар, уҳәа убас егьырҭгьы.

Абазатә театр Аԥсны егьырҭ ақалақьқәагьы ирҭаараны иҟоуп.

Аҳәынҭқарратә ареспубликатә абазатә драматә театр аԥҵан 2001 шықәсазы. Абар шьҭа 24 шықәса рыҩныҵҟа атруппа аспектакльқәа иааиԥмырҟьаӡакәа ахәаԥшцәа анапеинҟьарала ирԥылоит иагьынаскьаргоит. Атеатр Ҟарачы-Черқьесиа акультуратә ԥсҭазаара аҿы алага дууп.

Read 226 times - Ашәахьа, 22 Цәыббра 2025 13:18