Иҭыжьуп аԥсышәала икьыԥхьу арҵагашәҟәы «Алитературатә аԥхьара. 2-тәи акласс азы».

вчера 5:01

Иҭыжьуп аԥсышәала икьыԥхьу арҵагашәҟәы «Алитературатә аԥхьара. 2-тәи акласс азы».

Аҟәа. Цәыббрамза 10, 2025 шықәса. Аԥсныпресс. Иҭыжьуп аԥсышәала икьыԥхьу арҵагашәҟәы «Алитературатә аԥхьара. 2-тәи акласс азы». Уи авторцәас иамоуп Ф.Б. Хаҳәыбиа, З.Б. Ҵәыџьба, иара убас Х.Г. Шамба.

Ари Аԥсны аҵара Аминистрра ала азеиԥшҵараиурҭақәа рзы арҵагатә цхыраагӡатәқәа реиҭахәаԥшра аҳәаақәа иҭагӡаны икьыԥхьыз аԥышәатә ҭыжьымҭоуп.

Аԥсны аҵара аминистр актәи лхаҭыԥуаҩ Хьыбла Шамҩа иҟалҵаз адыррақәа рыла, иарбоу арҵагашәҟәы апробациа мҩаԥысуеит аҵара Аминистрра ахылаԥшра аҵаҟа иҟоу Б.У.Шьынқәба ихьӡ зху абжьаратәи ашкол №1 аҿы.

«Арҵаҩцәа ари арҵага шәҟәы ала аус руеит, нас доусы ргәаанагарақәа рҳәоит, разгәаҭарақәа ҟарҵоит. Убри ашьҭахь, иааиуа аҵарашықәс азы, ҳара арҭ арҵагашәҟәқәа ареспублика ашколқәа зегьы рахь идәықәаҳҵоит», — ҳәа еиҭалҳәеит лара.

Арҵагашәҟәқәа ҭыжьын Ҭырқәтәыла иҟоу аҷыдалкаатә зинмчы змоу Аԥсны ахаҭарнак Ибрагим Аҩӡбеи Увых Џьанкат Аитеки рыцхыраарала.

Read 46 times