Аҟәа. Жьҭаарамза 11, 2022 шықәса. Аԥсныпресс. Ашәахьа, жьҭаарамза 10 рзы Апарламент аҟны имҩаԥысит абиуџьети акредиттә еиҿкаарақәеи ашәахтәқәеи афинансқәеи рзы аилак аилатәара. Уи мҩаԥигон аилак ахантәаҩы Беслан Ҳалуашь. Аилак аилатәара лхы алалырхәит Аԥсны Аҳәынҭқарраҟны иҟоу ауаҩы изинқәа рыхьчаразы азинмчы змоу Асида Шьаҟрыл.
Ишьақәырӷәӷәоу аилатәара амшхәаԥштә инақәыршәаны, адепутатцәа иахәаԥшит Аԥсны Аҳәынҭқарраҟны иҟоу Ауаҩы изинқәа рыхьчаразы азинмчы змоу лаппарат 2023 шықәсазтәи аныхтәқәа рхарџьынҵа, ааигәа имҩаԥысраны иҟоу Аԥсны Жәлар Реизара-Апарламент асессиа аилатәараҟны ашьақәырӷәӷәаразы Апарламент абжьгаразы азыӡбагьы шьҭыхын.
