Аделегациа аилазаарҟны иҟан, акульура аминистр Ақаҩба Даур, аекономика аминистр Амқәаб Ҭемраз, жәларбжьаратәи аусеицуразы Аԥснытәи аҳәынҭқарратә Университет апроректор Ӷәынџьиа Максим.

Адәныҟатәи аусқәа рминистр Олег Барцыц Ахада иҭабуп ҳәа иеиҳәеит иара хаҭала ибзоураны ҳтәыла ас еиԥш зхыԥша дуу ааигәамрагыларатәи аустә форум аҽалархәразы иаиуз алшаразы. Барцыц ишазгәеиҭаз ала, сынтәа, асанкциақәа рамхра анаҩс, 62-тәи Дамасктәи жәларбжьаратәи аиармарка иалахәын 48 тәыла.

Уи иажәақәа рыла, Аԥсны апавилион ҷыдала азҿлымҳара аман: уи иаҭааит Шьамтәыла анапхгареи егьырҭ аҳәынҭқаррақәа рделегациақәа. Афорум аҩныҵҟа имҩаԥысит аԥснытәи аделегациеи шьамтәылатәи аиҳабыра ҿыц аминистрцәа хҩыки реиԥылара. Аминистр иара убас иаҵшьны иазгәеиҭеит Шьамтәыла инхо ҳџьынџьуаа иҟарҵаз адгыларагьы.

Акультура аминистр Ақаҩба Даур Аҳәынҭқарра Ахада адырра ииҭеит шьамтәылатәи иколлегацәеи иареи реиԥылара алҵшәақәа рзы.

Аекономика аминистр Амқәаб Ҭемраз далацәажәеит Шьамтәыла ақыҭанхамҩеи иареи реиҿцәажәара атәы.  

Жәларбжьаратәи аусеицуразы ААУ апроректор Ӷәынџьиа Максим дахцәажәеит адиаспора ахаҭарнакцәа злахәыз аиԥылара атәы. Аиԥылараҟны иалацәажәан ҳџьынџьуаа ААУ аҟны аҵара дырҵара иазкыз азҵаарақәа.

Аҳәынҭқарра Ахада аделегациа иалахәыз иҭабуп ҳәа реиҳәеит 62-тәи Дамасктәи жәларбжьаратәи аиармарка аҽалархәара аихшьалақәа рзы ирҭаз аинформациазы.  

«Ас еиԥш жәларбжьаратәи афорумқәа рылахәра Аԥсны азы аҵак ду амоуп. Аҭагылазаашьақәа шымараиамызгьы, аҳәынҭқарра иалшоз зегьы ҟанаҵеит ҳреспублика акрызҵазкуа аусмҩаԥгатә иалахәхаразы», — ҳәа иазгәеиҭеит иара.

Аҳәынҭқарра Ахада иазгәеиҭеит Аԥсны аринахысгьы Шьамтәылатәи Арабтә Республика аус ацура арҿиара ишацнаҵо. Бадра Гәынба иҭабуп ҳәа реиҳәеит Шьамтәыла иҟоу Аԥсны ацҳаражәҳәарҭа аусзуҩцәа қәҿиарала имҩаԥыргаз аусуразы.   

«Ҳдипломатцәа апрофессионализм ду аадырԥшит. Ҳара урҭ ҳтәылақәа ирыбжьоу аизыҟазаашьақәа рырӷәӷәараҟны рлагаламҭа ахә ҳшьоит хымԥада», — иҳәеит Аҳәынҭқарра Ахада.

Уи иҳәеит иҳабжьоу аизыҟазаашьақәа реиқәырхара адагьы, жәларбжьаратәи азхаҵара иазку аусура шымҩаԥгалатәу.

Бадра Гәынба Адәныҟатәи аусқәа рминистр Олег Барцыц инапы ианиҵеит Ааигәа Мрагылара, Африка, Алада-Мрагыларатәи Азиа атәылақәеи Аԥсни рыбжьара аизыҟазаашьақәа рышьақәыргыларазы аусура арӷәӷәара.  

Аҳәынҭқарра Ахада иаҵшьны иҳәеит акультура аусхк аҟны аусеицура иамоу аҵак ду, аминистр Даур Ақаҩба идиҵеит ари ахырхарҭаҟны аусура иҵегьы амҽхак арҭбаара.

Ҷыдала, Аҳәынҭқарра Ахада дазааҭгылеит Аԥсни Шьамтәылеи рыбжьара аекономикатә еизыҟазаашьақәа ирызку азҵаарақәа.

Иара убас ахшыҩзышьҭра аиҭеит Шьамтәыла инхо ҳџьынџьуаа Аԥснытәи аҳәынҭқарратә Университет аҟны аҵара дырҵара иамоу аҵак ду.