Аҟәа. Нанҳәамза 26, 2025 шықәса. Аԥсныпресс. Ареспублика Аԥсны ахьыԥшымреи асуверенитети жәларбжьаратәи разхаҵара Амш аҽны Бадра Гәынба Аԥсны Аҳәынҭқарра Актәи Ахада Владислав Арӡынба ҳаҭырла дигәалаиршәеит.
Аҟәа араион, Алада Ешыра ақыҭан Аԥсны Аҳәынҭқарра Актәи Ахада Владислав Арӡынба Имемориал амҵан ашәҭшьыҵәрақәа рышьҭаҵара ацеремониа мҩаԥысит. Уи ихьӡ иузаҟәымҭхо иадҳәалоуп аибашьраҿы игаз аиааиреи аибашьра ашьҭахь раԥхьатәи ашықәсқәа рзы иҟаз ауадаҩра дуқәа риааиреи.
Аусмҩаԥгатә иалахәын Аԥсны Ахада Бадра Гәынба, атәыла аԥыза-министр Владимир Делба, Аҳәынҭқарра Ахада Иусбарҭа анапхгаҩы Беслан Ешба, Жәлар Реизара-Апарламент Аиҳабы Лаша Ашәба, аиҳабыра алахәылацәа, Апарламент адепутатцәа, Аԥсны иҟоу Урыстәыла Ацҳаражәҳәаҩ Михаил Шургалин, аибашьра аветеранцәа, ауаажәларра рхаҭарнакцәа.
Аҳәынҭқарра Ахада ахьыԥшымрахь инагаз амҩа игәаларшәо, иаҵшьны иҳәеит ҳаамҭазтәи аԥсуа ҳәынҭқарра ахыҵхырҭақәа рыҟны игылаз рыхьӡ ҳамҳәар шамуа.
«Аԥсны Аҳәынҭқарра Актәи Ахада Владислав Арӡынба ахачҳара дуи аԥеиԥш агәрагареи дырсимволны дҟалеит. Иара иҟәыӷареи игәаӷьреи ирыбзоураны Аԥсны ахьыԥшымра ауасхыр азышьҭаҵан», — ҳәа иҳәеит Бадра Гәынба.
