Аусмҩаԥгатә иалахәын Аҳәынҭқарра Ахада Бадра Гәынба, аԥыза-министр Владимир Делба, Ахада Иусбарҭа анапхгаҩы Беслан Ешба, Жәлар Реизара-Апарламент Аиҳабы Лаша Ашәба, аиҳабыра алахәылацәа, Апарламент адепутатцәа, Аԥсны иҟоу Урыстәыла Ацҳаражәҳәаҩ Михаил Шургалин, аибашьра аветеранцәа, ауаажәларра рхаҭарнакцәа.

Нанҳәамза  26 рзы Аԥсны иазгәарҭоит ареспублика ахьыԥшымреи асуверенитети жәларбжьаратәи  азхаҵара Амш.

«Ари аныҳәа иахьа азгәаҳҭартә иҟазҵаз зықьҩыла Аԥсны ахақәиҭреи ахьыԥшымреи рзы зхы иамеигӡаз ауаа роуп. Раԥхьаӡа иргыланы акыр зҵазкуа амш, шьала икәабоу амш, абиԥарала Аԥсны аҵеицәа ззықәԥоз амш рыдысныҳәалар сҭахуп ҳажәлар. Иахьатәи амш пату зқәаҳҵаша, ҳзеиҷаҳаша, ахаҵгылара зҭаху мшны иҟоуп. Абиԥарақәа ирылшо зегьы ҟарҵароуп абри амш ҭоурыхла иаҳҳныҳәа дуны иаанхарц», – ҳәа 1992 – 1993шш. Аԥсны жәлар Рџьынџьтәылатәи еибашьра аҿы иҭахаз Рмемориал амҵан ашәҭшьыҵәрақәа рышьҭаҵара ашьҭахь иҳәеит Аҳәынҭқарра Ахада Бадра Гәынба.

Иара Урыстәылатәи Афедерациа анапхгара нанҳәамза 26, 2008 шықәсазы ирыдыркылаз аӡбамҭа аԥсуа жәлар рзы акырӡа зҵазкуаз, илахьынҵаӡбагаз ӡбамҭан ҳәа иазгәеиҭеит.  

«Ҳара иҭабуп ҳәа раҳҳәоит усҟан, жәибжь шықәса раԥхьа илахьынҵаӡбагаз аӡбамҭа здызкылаз Дмитри Анатоли-иԥа Медведеви гәыкала ҳиашара азхазҵоз, иахьагьы адгылара бзиа ҳазҭо Владимир Путини. Ари амш ҳара ҳзы хашҭшьа ақәны иҟам. Уи наӡаӡа ҳгәалашәараҿы иаанхоит», – ҳәа иҳәеит Бадра Гәынба.

2008 шықәса нанҳәамза 26 рзы Урыстәыла Ахада Дмитри Медвдев Аԥсны Аҳәынҭқарра Урыстәылатәи Афедерациа аганахьала азхаҵара иазкыз Аусԥҟа инапы аҵаиҩит.

Источник: https://apsnypress.info/ru/home/novosti/item/16996-v-parke-slavy-pochtili-pamyat-pogibshikh-v-otechestvennoj-vojne-naroda-abkhazii.

© АПСНЫПРЕСС.