Ашьыжь атурнир алахәылацәа Џьгьиарда ақыҭан Аԥсны Аҩбатәи Ахада, Аԥсны амҵәышәмпыл Афедерациа актәи ахада, «Ахьӡ-Аԥша» аорден I аҩаӡара занашьаз  Сергеи Уасил-иԥа Багаԥшь анышә дахьамадоу ашәҭ шьыҵәрақәа шьҭарҵеит. Урҭ иара убас иҭахаз Тамшьтәи адесант аибашьцәа ҳаҭырла  иргәаладыршәеит.   

Амш актәи азыбжазы акомандақәа «Аҟәеи» «Славянски» рыбжьара атурнир актәи аматч мҩаԥысит.

Атурнир аартра иазкыз аныҳәатә усмҩаԥгатә рхы аладырхәит Жәлар Реизара-Апарламент Аиҳабы Лаша Ашәба, аԥыза-министр ихаҭыԥуаҩ, аҿари аспорти русқәа рзы Аҳәынҭқарратә Еилакы ахантәаҩы инапынҵақәа назыгӡо Ҭарашь Ҳагба, аҵара аминистр Хана Гәынба.

Ҭарашь Ҳагба еизаз зегьы дрыдныҳәалеит:

«Ҳара шәара зегьы ишәыдаҳныҳәалоит иналукааша ауаҩы Сергеи Багаԥшь иаҳаҭыр азы имҩаԥысуа акыр зҵазкуа ари жәларбжьаратәи атурнир аартра. Иахьа араҟа иҳадгылоуп  аспорт аветеранцәа, Сергеи Уасил-иԥа иуацәеи иҭынхацәеи. Ҳара ҳтәыла азы турнир амҩаԥгара акыр зҵазкуа хҭысуп. Сынтәа ҳтурнир рхы аладырхәуеит Урыстәылатәи Афедерациантәи аа-командак.  Ҳасасцәа рахь схы рханы иҭабуп ҳәа расҳәарц сҭахуп ҳганахьала иаадырԥшыз агәрагара азы», – ҳәа иҳәеит иара.

Ахраҿа агаразы атурнир иалахуп Аԥснытәи 10 командак («Сухум», «Апсны»), Урыстәыла (ақалақьқәа: Владикавказ, Волгоград, Волгодонск, Славианск-на-Кубани, Черкесск, Шахты, «Росатом» акомандақәа), иара убас Аахыҵ Уаԥстәыла акоманда. Атурнир мҩаԥыслоит ԥхынгәымза 6 аҟынӡа. 

Атурнир аӡбаҩ хада  - Алеқсандр Банников (ақ.Краснодар).

Жәларбжьаратәи атурнир аиҿкаара ахахьы иргеит Аԥсны аҿари аспорти русқәа рзы Аҳәынҭқарратә Еилаки Аԥсны амҵәышәмпыл Афедерациеи. Убри аан адгылара ҟанаҵеит амобилтә еимадара Аилазаара «А-Мобаил».