Абал адагьы, хымш рыҩныҵҟа ахәыҷқәа ргәыԥ аа-ҩык аиҳабацәа рыцны аинтерес зҵоу аҵарадырратә усмҩаԥгатәқәа жәпакы рхы аладырхәуеит.

Маиа Цыбулевскаиа апрограмма акыр игәылҭәаауп ҳәа инаҵшьны иазгәалҭеит.

«Ахәыҷқәа зегьы рзы уи рыԥсҭазаараҿы акыр зҵазкуа хҭысны иҟалозар акәхап», - ҳәа иазгәалҭеит лара.

Ахәыҷқәа рцара ргәы хыҭхыҭуа иазыԥшуп.

Аҭаара алахәылацәа ируаӡәку, А. М. Ҷоҷуа  ихьӡ зху Аӡҩыбжьатәи абжьаратәи ашкол аҵаҩы Марианна Дочиа еиҭалҳәеит:

«Сара сшалырхыз анеилыскаа даара иџьасшьеит, уамакалагьы сеигәырӷьеит. Сара иаразнак уи атәы зегьы ирзеиҭасҳәеит, сандугьы уахь дналаҵаны. Сириусҟа снаскьаргон сҭаацәа, сгәалаҟазаарагьы даараӡа ибзиан».

Гәылрыԥшь араион Драндатәи абжьаратәи ашкол аҟынтәи даҽа ҵаҩык - Озан Кәырт-оглы абас иҳәеит:

«Сара акыр ҵуеит ас еиԥш аҭаара гәахәараны исымеижьҭеи. Сара ирацәаны хра злоу ахцәажәарақәа саҳахьан Сириус иазкны. Агәыӷра сымоуп ари аҭаара аҵаразы исымоу агәазыҳәара еиҳагьы иарӷәӷәап ҳәа» .

Урыстәылазегьтәи абал алагоит уаҵәы, рашәарамза 27, асааҭ 20:00 рзы.