Аҟәа. Рашәарамза 25, 2025 шықәса. Аԥсныпресс. Ацрыӡрыцқьарҭақәа дыргылаанӡа афонҿыцтәи аӡҭакқәа рҭагылазаашьа арҽеиразы аамҭалатәи аӡбара ҳәа ҩ-гәаанагарак ыҟоуп, ҳәа Аҳәынҭқарра Ахада Бадра Гәынба адҵа анагӡаразы адырра ҟаҵо иҳәеит Шьаҭанкыла аргылара Аусбарҭа аиҳабы Дамир Гамсаниа.
«Адҵа анҳау ашьҭахь ҳара анҭыҵтәи акомиссиа аԥаҳҵет. Аекологцәа ҳацны аӡҭакқәа ҳарҭааны игәаҳҭеит. Иҷыдоу акомиссиа Афонҿыцтәи апарк аҿы иҟоу аӡҭакы аҟьашьра зыхҟьаз еилнакааит.
Аекологцәа излашьақәдыргылаз ала, ааигәатәи асанаториақәа рыӡцарҭақәа рҟынтәи аӡҭакы ахимиатә маҭәашьарқәа ахьалало иахҟьоит. Урҭ амаҭәашьарқәа, ари атуристцәа рылаԥш хызкуа аӡҭакы аекосистема ԥхасҭартәуеит», – ҳәа иҳәеит Дамир Гамсаниа.
«Ацрыӡрыцқьарҭақәа дыргылаанӡа афонҿыцтәи аӡҭакқәа рҭагылазаашьа арҽеиразы аамҭалатәи аӡбара ҳәа ҩ-гәаанагарак ыҟоуп: аӡцарҭақәа Ԥсырӡха аӡиас аладатәи аган ахь риагара, ма аӡхыҽҽагьы абрахь иналаҵаны, егьырҭ ахыҵхырҭақәа рҟынтәи аӡыцқьа аашьҭра», – ҳәа иҳәеит Дамир Гамсаниа.
Шьаҭанкыла аргылара Аусбарҭа данизыӡырҩ ашьҭахь, Аҳәынҭқарра Ахада уажәы зегьы ирыцку аӡҭакқәа рҭагылазаашьа арҽеира ауп, аиҳарак Афон Ҿыц есымша атуристцәа ахьырацәо ҳасаб азуны ҳәа иазгәеиҭеит.
«Заа иҟоу апроблемақәа рзы адырра ҟарҭазҭгьы ҳара атуристтә аамҭахәҭа алагаанӡа ихымԥадатәиу аусмҩаԥгатәқәа рынагӡара ҳахьӡаргьы ҟалон», - ҳәа иҳәеит Бадра Гәынба.
