Урыстәыла атуроператорцәа рделегациа аминистр ириҭаз ааԥхьаразы иҭабуп ҳәа иарҳәеит. «Иҭабуп ҳәа шәаҳҳәоит араҟа аҟазааразы иҳауз алшаразы. Аԥсни Урыстәылеи ирыбжьоу адгьылмҩатә  ҳәаа шыҟоугьы, аҟәатәи аҳаирбаӷәаза аусура аларгара акыр зҵазкуа ԥхьаҟа узго шьаҿоуп.

Урыстәылеи Аԥсни рнапхгарақәа иҟарҵо адгылара иабзоураны аҳаирбаӷәаза аусура иалагеит, шьҭарнахыс ҳара мҽхакыҭбаала аусеицура ҳазхиоуп. Атуризм атема иарбан ашықәс аамҭазаалакгьы азы актуалра аҵоуп», - ҳәа иазгәрҭеит аиԥылара иалахәыз.

Аминистр, ахәҭакахьала урыстәылатәи апартниорцәа Аԥсны ахь иаадырԥшуа аинтерес азы иҭабуп ҳәа реиҳәеит.  

«Иҭабуп ҳәа шәасҳәоит шәусуреи ареспублика аҿиара аҿы шәлагалеи рзы. Шәара шәеиԥш иҟоу ирыбзоураны Аԥсны атуризм иҿыцу аҭагылазаашьақәа ирышьашәаланы аҿиара иаҿуп», – ҳәа иҳәеит Асҭамыр Логәуа.

Аиԥылара аҿы ҷыдала ахшыҩзышьҭра аҭан ареспублика мрагыларатәи ахәҭа аҿиара.

Урыстәылатәи атуристтә бизнес ахаҭарнакцәа иреиуаз аӡәы  иазгәеиҭеит:

«Атуристцәа иахьашьцылахьоу аҟынтәи Аԥсны мраҭашәаратәи ахәҭа алырхуеит, избан акәзар, акурортқәа реиҳарак Урыстәыла аҳәаа иазааигәоуп азы. Аха шьҭа, аҳаирбаӷәаза анаадырт ашьҭахь, ҳара иӡыраҳгалароуп ареспублика мрагыларатәи ахәҭа. Убас иҟаҵатәуп, атурист еиликаауазарц: аҳаирпланқәа аԥснытәи аҳаирбаӷәаза ахь иԥыруеит, шьҭа иаанхаз урҭ рырҭәра ауп. Шьцыларала Шәачаҟа иаауа ауаа ирзеиҭаҳәалатәуп арахь раара феидас иалоу атәы. Ари зегьы иаҳзеиԥшу хыдҵоуп – аҳәынҭқарразгьы, ҳара атуроператорцәагьы ҳзы».

Иҿыцу ахырхарҭаҿы ицәырҵуа ауадаҩрақәа ртәы далацәажәеит атуроператор «Библио Глобус» ахаҭарнак:

«Рашәарамза  12 инаркны ҳара ҳҳаирпланқәа есыҽны Аԥсныҟа аԥырра иалагеит. Ҳара есыҽны  400 ҭыԥ раанкылара иадҳәалоу аҭагылазаашьа ҳақәшәеит. Ауаа ҵаауеит: уи шәарҭаӡами ҳәа? Аԥсныҟа ацара Европтәи Аидгыла, мамзаргьы арабтә тәылақәа рахь авиза аиура ианыԥшуама ҳәа? Аӡәырҩы ииашоу аинформациа роуӡом. Уи арҽеира ҳара иаҳзеиԥшу хыдҵаны иҟоуп».

Аиԥылара иалахәыз иҿыцу амаршрут аманшәалара атәы азгәарҭеит:

«Аҳаирбаӷәара аартра хра злоу усны иҟоуп атурист атәылахь дааны 20 минуҭ рыла Аҟәанӡа дахьзынаӡо. Уаҳа шьапыла аҳәаа ахысра аҭахны иҟалаӡом».

Аминистр аблогерцәеи аинфлиуенсерцәеи адыԥхьаланы аинформациатә кампаниа амҩаԥгаразы ажәалагала ҟаиҵеит.

Атуроператорцәа иарбоу аидеиа иадгылеит:

«Ас еиԥш иҟоу апрактика ҳара егьырҭ ахырхарҭақәа рҿы ҳхы иаҳархәоит. Адгылара ҟалар, ҳабрендқәа разгәаҭарагьы уахь иналаҵаны, ҳара ҳазхиоуп аминистрра аус ацура».

Аԥсшьараамҭазы анхара ахәԥсақәа ирыдҳәаланы ишьақәгылаз аҭагылазаашьагьы иалацәажәеит.

«Иҳаҩсыз ашықәс азгьы, ҳазҭоу ашықәс азгьы ҳара анырхара азы иаалырҟьаны ахәԥсақәа рыларҟәра иадҳәалоу аҭагылазаашьа ҳақәшәеит, аквотақәа ахьаахәоу аномерқәагьы рыла уахь иналаҵаны.  Аотель аномерқәа иларҟу ахәԥсақәа рыла ианыҭихо, аха убри аан аҵыхәтәан  Урыстәылантәи атурпутиовка  ахәԥса зынӡа анҽеиҭанакуа иадҳәалоу аҭагылазаашьа ацәцара азы  иҟаҵатәу    еилаҳкаар ҳҭахын» – ҳәа азҵаара ҟаиҵеит аминистр.

«Ҳара зыхәԥса ларҟу атурқәа ҳархьыԥшуп. Ҳҳхаҭақәа ҳзы уи феида аланы иҟам. Аҭирақәа анмаҷхо ахәԥсақәа лаҳарҟәыр акәхоит. Егьырҭ ахырхарҭақәа, шықәсыбжак шыбжьоу атуристцәа рыла аҭыԥқәа ахьаанкылоу ирҿырԥшны, - ҳара даҽа ҭагылазаашьак ҳамоуп.  Атуристцәа аҵыхәтәанынӡа иԥшуп, ацара аамҭа аламҭалазҵәҟьа апутиовка ргоит. Уи аномертә фонд иҭацәны аанхара азы ашәарҭара цәырнагоит. Иарбоу аеффект армаҷразы иҟаҵатәуи? Аотелиерцәа  заанаҵы, асезон анҵәамҭазы  иааиуа ашықәс азы ихшыҩрку ахәԥсақәа рыла, аекономикатә планркрала  аилаӡарақәа бжьарҵозҭгьы, зегьы даҽакала иҟалар алшон.  Ари азҵаара атурқәа рыҭирақәа мацара иадҳәалаӡам, уи иааизакны иадҳәалоуп аинвестициатә климат аҭагылазаашьагьы», – ҳәа аҭак ҟалҵеит аиԥылара иалахәыз руаӡәы.

Аиԥылара ахыркәшамҭаз аминистр астратегиатә хырхарҭа аҳасабала ақыҭатә туризм атема шьҭихит:

«Ақыҭатә туризм – ари баша аԥсшьара акәӡам. Ари ауаа ақыҭақәа рахь рырхынҳәра, аҭыԥ аҿы аекономика алзыршо усуп. Ҳара ҳқыҭақәа атурист идыргалар рылшоит иуникалу аалыҵқәа: ацха, амандарина, аҩнтәи ҩы, ажәакала, акы иаламҩашьо атмосфера.  Ақыҭатә туризм, ҳара ҳгәаанагарала, хымԥада арҿиара аҭахуп. Шәара шәгәы ишԥаанагои, уи адҵаалара аиуру?»

Аҭак ҳәара аҭахымкәа ақыҭатә туризм ахатә ҭыԥ ааннакылоит ҳәа иҟаҵан:

«Ааи, аинфраструктура ҟалар, ари ахырхарҭа даара апопулиарра аҵаны иҟалоит. Ҳара гәахәарыла ус еиԥш иҟоу атурқәа ҳҭилоит».

Аиԥылара ахыркәшамҭаз аминистр анаҩсгьы аусеицура ацҵаразы агәазыҳәара ааирԥшит.

«Ҳара ҳҿаԥхьа иӡбатәны иқәгылоуп ирацәаны азҵаарақәа, аиҳарак ареспублика мрагыларатәи ахәҭа ала. Шәара шәҟәынтәи адгылара ҳауп ҳәа агәыӷра ҳамоуп», – ҳәа иҳәеит Асҭамыр Логәуа.