Даанкылоуп Жәлар Реизара-Апарламент ԥыхьатәи адепутат Адгәыр Ҳаразиа.

14.Рашәара.2025

Даанкылоуп Жәлар Реизара-Апарламент ԥыхьатәи адепутат Адгәыр Ҳаразиа.

Аҟәа. Рашәарамза 14, 2025 шықәса. Аԥсныпресс. Атәыла Аҳәынҭқарратә шәарҭадара Амаҵзуреи аҩныҵҟатәи аусқәа Рминистрреи рыла имҩаԥгаз аоператив-ԥшааратә усмҩаԥгатәқәа ирылҵшәаны, рашәарамза 14 рзы даанкылан Жәлар Реизара-Апарламент ԥыхьатәи адепутат Адгәыр Ҳаразиа. Уи иаанкылара рхы аладырхәит Аҳәынҭқарратә шәарҭадара Амаҵзура ахантәаҩы Дмитри Дбари аԥыза-министр ихаҭыԥуаҩ, аҩныҵҟатәи аусқәа рминистр Роберт Кьиути, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.

Раԥхьатәи амшқәа инадыркны ауаажәларра рыҩныҵҟа аарезонанс ду зауз ари аус Аҳәынҭқарра Ахада Бадра Гәынба хаҭала ахылаԥшра аиҭон.

Фымз инареиҳаны Аҳәынҭқарратә шәарҭадара Амаҵзуреи аҩныҵҟатәи аусқәа Рминистрреи роперативтә маҵзурақәа Адгәыр Ҳаразиа дахьыҟоу аҭыԥ аилкааразы мҽхакыҭбаала аусура мҩаԥыргон.

Адгәыр Ҳаразиа иԥшаара хацыркын, 2024 шықәса ԥхынҷкәынмзазы Апарламент ахыбра аҩныҵҟа дахьхысыз иахҟьаны адепутат Вахтанг Гәаланӡиа ишьреи адепутат Кан Кәарҷиеи ихәреи аныҟала ашьҭахь. Усҟан Адгәыр Ҳаразиа ацәгьоура аныҟаиҵа ашьҭахь аҭыԥ аҟынтәи иҽӡаны дцеит.

Read 215 times - Амҽыша, 15 Рашәара 2025 15:28