Апарламенттә Еилакы ахантәаҩы Беслан Ҳалуашь иажәақәа рыла, зегьы ирыцку – атуристтә џьармыкьа алахәылацәа зегьы: имаҷу реиԥш идуу атуристтә операторцәа рзы еиҟароу аконкуренттә ҭагылазаашьақәа раԥҵара. Еиуеиԥшым ахылаԥшырҭақәа рхаҭарнакцәа алархәны аиԥыларақәа рымҩаԥгара азԥхьагәаҭоуп.

«Ҳара хықәкыс иҳамоуп азакәанԥҵара аиҭакрақәа ралагаларазы цқьа ҳазхәыцны, ишәа-иза зҳәаз еиԥш, еибакапануа, ибалансрку аӡбамҭақәа рыдкылара. Аџьармыкьа аҿы аҭыԥ амазар зылшо анамысдарыла аконкуренциа аԥхьырҟәҟәара ҳалҳаршароуп хымԥада», – ҳәа иҳәеит  Беслан Ҳалуашь.

«Аԥснытәи атуризм Аидгыла» апрезидент Анна Калиагина атуризм аусхкы аҿы иҟоу азакәанԥҵара аиҭахәаԥшреи уи аиӷьтәразы иҿыцу ажәалагалақәа реиқәыршәареи шхымԥадатәиу азгәалҭеит. 

«Ахәԥсақәа рылаҟәра апроблема адемпинг мацара адагьы иԥсыҽу атуристтә сезонгьы иадҳәалоуп. Ас еиԥш иҟоу аҭагылазаашьақәа рҽазыҟаҵара хымԥада иаҭахуп, избан акәзар иҟоу ахәԥсақәа аџьармыкьатә ахәԥсақәа ирықәшәаӡом, атуроператорцәа ракәзар, урҭ амаҵзурақәа рхатәԥса аҵкьыс еиҵаны ахәԥсақәа шьақәдыргылоит», - ҳәа иазгәалҭеит Анна Калиагина.

Лара идуум асасааирҭатә ҩнқәа реиԥш икомфорту аотелқәа змоу аусдкылаҩцәа рзы феида алам аномерқәа иларҟу ахәԥсала аҭара ҳәа инаҵшьны иазгәалҭеит. Уи иара убас атәыла аимиџь ианыԥшуеит, иара убри ала хра злам агәнылара аԥнаҵоит, ҳәа илҳәеит лара.

«Аԥснытәи атуризм Аидгыла» апрезидент аҭыԥантәи абизнесуаа аԥсшьаҩцәа  ирыдыргало амаҵзурақәа рхаҭабзиара ашьҭыхра иашьҭоуп еиҳа иалаҟоу аклиентцәа радыԥхьалара азы ҳәа инаҵшьны иазгәалҭеит.

«Ҳара амшын аԥшаҳәа иаԥну аҭыԥқәа рҿы мацара акәӡам атуризм аҿиара ахьалҳаршо, ареспублика егьырҭ араионқәа рыҿгьы, Аԥсны асасдкылара аҩаӡареи еиҳа иҳараку аҩаӡараҿы инагӡахо амаҵзурақәеи ҳасасцәа дырбара ҳҽазаҳшәоит», – ҳәа илҳәеит лара.

Анна Калиагина ааигәа имҩаԥысыз атуроператорцәеи атуризм аминистри реиԥылара атәы еиҭалҳәеит. Хара имгакәа иарбоу азҵаарала еиҭа аиԥыларақәа рымҩаԥгара азԥхьагәаҭоуп.  

Ашәахтәқәеи аизгақәеи рминистр Едгар Бениа  еизаз атәыла атуристтә усхкы аҟынтәи ахәԥсақәа рышьақәгылареи  ашәахтә лагалақәеи шымҩаԥысуа азы адырра риҭеит.

«Ахәԥсақәа еиуеиԥшым аамҭахәҭақәа рзы атуристтә обиектқәа рыԥшәмацәа рыла акәымкәа Урыстәылатәи Афедерациа аҵакыраҿы аус зуа атуроператорцәа рыла ишьақәгылоит. Убри инамаданы, аамҭак азы атурист иаагозар, 300 мааҭ ҳәа Аԥсныҟа апутиовка ааихәазар, иарбоу аобиект  200-300 мааҭ ашәоит ҳәа иаанагаӡом. Уи бжьаратәла ирыбжьарҵаз аиқәшаҳаҭраҿы иарбоу аамҭахәҭа зегьы азы ишьақәгыло атехнологиатә хәыԥса акәын. Уи аобиект аҿы амаҵзура рхатәԥса аҵкьыс еиҵаны изыҟалаӡом», – ҳәа иҳәеит Едгар Бениа.

Иара иазгәеиҭеит ашәахтә лагалақәа еиҳа иалазгало аотель маҷқәа, мамзаргьы аотель дуқәа роуп ҳәа аҳәара шиашам.

Едгар Бениа иажәақәа рыла зегьынџьара, аобиектцыԥхьаӡа рҿы, есышықәса ашәахтә лагалақәа реицҵалыҵ аизҳара иаҿуп. Аминистр инаҵшьны иазгәеиҭеит атуристтә усхкы аҭышәынтәаларазы аҳәынҭқарратә знеишьа шхымԥадатәиу, адепутат Ерик Рштуни ишьҭихыз идуу аотельқәеи имаҷу асасааирҭақәеи рыбжьара аконкуренциа апроблема алагьы уахь иналаҵаны.  

Адепутат Инар Гыцба игәаанагарала, атуристтә амҭахәҭа анхыркәшахалак ашьҭахь аҭагылазаашьа анализ азура хымԥадатәны иҟоуп.

«Усҟан ҳара иҟоу аҭагылазаашьа еиҳа еилкааны, аихшьаалақәа рыла ишьақәыргыланы иҳамазаауан. Иахьатәи амш азы ҳара иконкрету астатистикатә дыррақәа ҳәа ҳазхьаԥшуа ҳәа акгьы ҳамаӡам», – ҳәа иазгәеиҭеит иара.

Уи игәаанагарала, атуристтә усхкы ҭышәзныртәало азакәан иҟоу аҭагылазаашьа иақәшәаӡом.

«Ҳара аџьармыкьаҿы имҩаԥысуа зегьы анализ азуны ҳзакәанԥҵарагьы уи иақәшәо иҟаҳҵароуп», – ҳәа иҳәеит  Инар Гыцба.

Аусдкылаҩ Михаил Сиҷынаа атәыла анапхгара аусеицуразы амадареи ибжьаҵоу аиқәшаҳаҭрақәа зегьы рынагӡареи ишазхиоу азы аҳәамҭа ҟаиҵеит. Иара инаҵшьны иазгәеиҭеит афинанстә лагалақәа зегьы шаартхо, урҭ зегьы Аԥсны ишаанхо.

«Аԥаратә хархәагақәа зегьы Аԥсныҟа иаалоит, уи аиқәшаҳаҭраҿы инҭкааны иарбоуп. Копеикгьы даҽаџьара, даҽа тәылак ахь ицаӡом. Уи агәаҭарагьы мариоуп», - ҳәа иҳәеит иара.

Аусдкылаҩ иара убас азакәанԥҵаратә шьаҭа аиӷьтәразы иҟоу аԥшьгара дшадгыло азгәеиҭеит.

«Аиқәшаҳаҭрақәа рыбжьаҵара аҭаххозар, ҳара урҭ аиқәшаҳаҭрақәа ихадоу алахәылацәаны ҳҟалоит. Ҳара алахәылацәа зегьы рыбжьара аиқәшаҳаҭра ҟаҳҵар ауеит, уи ԥымкрадагьы инаҳагӡалоит. Аиқәшаҳаҭра еилазгаз ахараԥса иршәахоит», – ҳәа иҳәеит иара.

Михаил Сиҷынаа аотелиерцәа ирзыфеидоуп аномерқәа рыҭира рашәарамза инаркны цәыббрамзанӡа мацара, егьи иаанхаз аамҭазы атуристтә бизнес ахашәала ду ацны иҟам ҳәа иазгәеиҭеит.

«Иахьатәи амш азы иалшо зегьы ҟаҵоуп, иарбоу аусура аҵакыра ҳара излауа ала иаанаҳкыларц азы. 80-85% рҟынӡа иаахәахәо зегьы атәыла аҩныҵҟа  иаахәахоит», – ҳәа адырра ҟаиҵеит Михаил Сиҷынаа.

Иара атуристтә бизнес ахаҭарнакцәа «ареспублика иқәнаргыло аҭагылазаашьақәа зегьы ирықәшаҳаҭхоит» ҳәа иазгәеиҭеит.

«Даҽакалагьы ҟалашьас иамоузеи?» – ҳәа иҳәеит аусдкылаҩ.

Атуристтә оператор «Библио-Глобус» ахаҭарнак Алиас Ҵәыџьба убасҵәҟьа атуризм аиндустриа аҿы ахәԥсақәа рышьақәгылара аоптимизациа азура азы азакәанԥҵаратә аиҭакра шхымԥадатәиу азгәеиҭеит.

Апарламенттә Еилакы ахантәаҩы Беслан Ҳалуашь ареспубьлика атуристтә усхкы аҿы  ишьақәгылаз аҭагылазаашьа аҭышәынтәалара алзыршо ауснагӡатәқәа еиҳа инарҭбааны, шьаҿа-шьаҿала разхәыцразы атуризм Аминистрра адыԥхьаларала Аилак аилатәара амҩаԥгара азԥхьагәаҭоуп ҳәа адырра ҟаиҵеит.