«Аҵакыра шықәсыки бжаки раахыс арыцқьареи азыҟаҵареи иаҿын, уажәы ихыркәшоуп аиҭашьақәыргылара актәи аетап – амҩахәасҭақәа шьҭаҵоуп, алашарбагақәа, аҟәардәқәа, ажрақәа ирыкәыршаны агәараанда шьақәыргылоуп, ажәытәтәи абахҭа ауадақәа руак ахьчаҩцәа руада ҳәа еиқәыршәоуп. Иара убас, ажрақәа рзы алашарбагақәеи аинформациатә дыргақәеи рышьақәыргылара азԥхьагәаҭоуп, аха макьана аусқәа рацәоуп», - ҳәа иҳәеит Аинар Инал-иԥа.

Аинар Инал-иԥа иара убас иазгәеиҭеит ажәҩан аҵаҟа иаарту амузеи-ҳәырԥсарра аекспонатқәа есааира ишацлало:

«Иахьа иаарԥшу зегьы 10% рҟынӡоуп иахьынаӡо. Уимоу, даараӡа ирацәаӡаны макьаназы иаарԥшым архиологиатә обиектқәа аконсервациа рызумкәа иаанханы иҟоуп».

Иара еиҭеиҳәеит, 2023 шықәсазы аҳәарԥсарра «Аҟәатәи абаа» аҵакыраҿы  иаарту ажәҩан аҵаҟа амузеи аартразы аԥшьгара адгылара шеиҭаз Жәлар Реизара-Апарламент адепутат Дмитри Маршьан.  Анаҩс ажәҩан аҵаҟа иаарту амузеи аԥҵаразы аԥарақәа Апарламент аԥшьгарала 2023 шықәсазы ареспубликатә биуџьет аҟынтәи иазоужьын. Амузеи аартра гәҭакы хадас иҟоуп амузеи аҭаларазы абилетқәа рыҭираҟынтәи идырҳауа аԥарала ажрақәа рымҩаԥгаразы алшара аиура ауп.

Иахьа Жәлар Реизара-Апарламент Аиҳабы Лаша Ашәба араҟа аусура амҩаԥысшьа гәеиҭеит.

Жәлар Реизара-Апарламент Аиҳабы Лаша Ашәба  Аинар Инал-иԥа иҟаиҵаз ааԥхьарақәеи адепутатцәа Дмитри Маршьани Венори Бебиеи рпарламенттә аԥшьгареи акыр зҵазкуа акультура-ҭоурыхтә обиект аиқәырхара аус аҿы  иамоу аҵакы ахадара азгәаҭо иҭабуп ҳәа еиҳәеит.