25 шықәса Аԥсны Владислав Арӡынба ишықәсны ишрылаҳәоу иҳәеит, уи аҳәаақәа ирҭагӡаны иазԥхьагәаҭоу  агәаларшәаратә уснагӡатәқәа дрыхцәажәеит, атәыла Раԥхьатәи Ахада изы игәаанагара иҳәеит, уи ҳаамҭазтәи Аԥсны ашьақәгылараҿы инаигӡаз ароль дазааҭгылеит.

«Владислав Григори-иԥа Арӡынба – ҳаамҭазтәи аԥсуа ҳәынҭқарра ауасхыр азышьҭазҵаз, Аԥсны Раԥхьатәи Ахада диижьҭеит 80-шықәса аҵра — акырӡа зҵазкуа хҭысуп ҳтәыла зегьы азы. Владислав Арӡынба — ихьыԥшым аԥсуа ҳәынҭқарра дасимволуп. Иара ихьӡ иузаҟәымҭхо иадҳәалоуп Аԥсны жәлар Аџьынџьтәылатәи еибашьра аҿы аиааира агара, амилаҭтә ҳәынҭқарара аиҭашьақәыргылара, аҳәынҭқарратә мчреи анпхгараҭареи иҿыцу асистема аԥҵара.

Владислав Григори-иԥа — аҵарауаҩ-аҭоурыхҭҵааҩы, аҭынч ԥсҭазаароа иадҳәалоу азанааҭ змаз уаҩын. Аха Аԥсны жәлар Рџьынџьтәылатәи еибашьра аан иара ахарахәыцреи агәаӷьреи  злаз ар рԥыза-астратег, афырхаҵа иаҳасабала ихы ааирԥшит. Ажәлар иара игәра ргон, рымчи-рылшареи еибыҭаны рҽеидыркылеит, убри иабзоураны аиааирагьы ргеит», — ҳәа иҳәеит Аҳәынҭқарра Ахада.