Аџьынџьтәылатәи еибашьра Дуӡаа иалахәыз ҳџьынџьуаа рбаҟа аадыртит Цандрыԥшь аҳаблаҿы.

вчера 19:49

Аџьынџьтәылатәи еибашьра Дуӡаа иалахәыз ҳџьынџьуаа рбаҟа аадыртит Цандрыԥшь аҳаблаҿы.

Аҟәа. Лаҵарамза 7, 2025 шықәса. Аԥсныпресс. 1941-1945 шш. Аџьынџьтәылатәи еибашьра Дуӡӡа иалахәыз ҳџьынџьуаа рбаҟа аартра иадҳәалаз аныҳәатә усмҩԥгатә мҩаԥысит лаҵарамза 7 рзы Цандрыԥшь ақыҭан.

Аиааиразы зхы иамеигӡаз ҳаҭырла иргәаладыршәарц арахь иааит Гагра араион ауааԥсыра. Абаҟа аартра азин рырҭеит Цандрыԥшь аҳабла ахада Едгар Быҭәбеи Гагра араионтә Еизара ахантәаҩы Асҭан Агрбеи.

Иара убас Цандрыԥшь аҳаблаҿы имҩаԥысуеит еиҭаҵуа ацәыргақәҵа «Аибашьра иԥшьоу адаҟьақәа». Уаҟа ицәыргақәҵоуп аибашьра афырхацәа рфотосахьақәеи аибашьра ахроникеи.

Уаҵәы, лаҵарамза 8 рзы, ацәыргақәҵа аус аулоит Бзыԥҭа аҳаблан.

2015 шықәсазы Цандрыԥшь аҳабла ауааԥсыра аибашьцәа-афырхацәа рбаҟа ахьыргылахо аҭыԥ аҿы ахаҳә шьҭарҵеит. 10 шықәса рышьҭахь амемориал аартра алыршахеит Аџьынџьтәылатәи еибашьра Дуӡӡеи Аԥсны жәлар Рџьынџьтәылатәи еибашьреи рфырхацәа рбаҟақәа реиҭашьақәыргылара апроект анагӡара иабзоураны. Апроект иалахуп 82 аԥснытәи ақыҭақәа. 77 млн. мааҭ инареиҳаны аусурақәа рынагӡаразы иазоунажьит Урыстәыла Ахада игрантқәа Рфонд.

Урыстәылатәи Афедерациа Ахада игрантқәа Рфонд Аԥсны инагӡахо социалла зҵакы дуу апроектқәа адгылара рынаҭоит. Афонд ахықәкы хадақәа иреиуоуп – ԥыхьатәи Асовет Еидгыла ажәларқәа Аџьынџьтәылатәи еибашьра Дуӡӡа аҿы Аиааира агара аҿы рлагала азы аҭоурыхтә гәалашәара аиқәырхара. Иарбоу ахықәкы анагӡара аҳәаақәа ирҭагӡаны имҩаԥысуеит амемоориалқәа, аобелискқәа, уҳәа егьырҭ арратә ахьӡ-аԥша абаҟақәа рҭеиҭыԥш аиӷьтәра.

Read 93 times