Аԥсны атәылахьчара аминистр Владимир Ануа зхадараҿы дыҟоу аԥснытәи аделегациа аилазаараҿы иҟоуп Аԥсны Арбџьармчқәа Рыштаб Хада аиҳабы, атәылахьчара аминистр актәи ихаҭыԥуаҩ, аинрал - полковник Владимир Савченко, атәылахьчара аминистр ихаҭыԥуаҩцәа Нодар Аҩӡбеи  Давид Бжьаниеи.

Аҭаара аҳәаақәа ирҭагӡаны лаҵарамза  8 рзы имҩаԥысуеит Аԥсны атәылахьчара аминистр Владимир Ануеи Урыстәылатәи Афедерациа атәылахьчара аминистр Андреи Белоусови реиԥылара. Аиԥылараҿы ирылацәажәараны иҟоуп арра-политикатә ҟазшьа змоу аҵаарақәа, арра-техникатә усеицура, иара убас Ареспублика Аԥсни Урыстәылатәи Афедерациеи атәылахьчаратә  усбарҭақәа русеицура иадҳәалоу азҵаарақәа.

Лаҵарамза 9 рзы Аԥсны атәылахьчара ахылаԥшырҭа Хада аделегациа 1941 – 1945шш. Аџьынџьтәылатәи еибашьра Дуӡӡа аҿы Аиааира агара Амш  80-шықәса ахыҵра иазку  Апарад иалахәхоит.