Асасцәа аԥсшәа раҳәо, Гәынба Бадра иазгәеиҭеит Аԥсни Урыстәылеи рыбжьара акультуратәи агуманитартәи еимадарақәа рырӷәӷәара аҵак ду шамоу. 

«Аԥсны шәара иҟашәҵо адгылара аҵакы еилыркаауеит. Аҳаиреимадара аартра — аусеицуразы акрызҵазкуа шьаҿаны иҟалеит. Агәра згоит шьҭа лассы-лассы ареспублика шәшаҭаало», — инааҵшьны иҳәеит Аҳәынҭқарра Ахада. 

Евгени Книазев адкыларазы иҭабуп иҳәеит, аусеицура иҵегьы аизырҳара дшазхиоу азгәаҭаны. 

«Иҟашәҵаз асасдкыларазы, акультуратә проектқәа ирышәҭо азҿлымҳаразы иҭабуп ҳәа шәасҳәоит. Ҳара ҳзы акраҵанакуеит аҳәынҭқарра арҿиаратә аԥшьгарақәа адгылара ахьанаҭо, саргьы Аԥсныҟа лассы-лассы аара салагоит ҳәа сыӡбеит», - ҳәа иҳәеит жәлар рартист. 

Ҷыдала иҭабуп ҳәа иаҳәан Александр Журавски. Аҳәынҭқарра Ахада далацәажәеит Журавски УА акультура аминистр ихаҭыԥуаҩ имаҵураҟны даныҟаз акультура аусхк аҟны апрограммақәа рынагӡараҟны илагаламҭа атәы.