Пиотр Толстои Аԥсны жәлар Аҳәынҭқарра Ахада имаҵура ахагылара рыдиныҳәалеит, иара убас урыстәылатәи аделегациа иаиуз адкылара бзиа азы иҭабуп ҳәа иҳәеит.  

Иара Аԥсны Апарламент атәыла азы иуадаҩу аамҭақәа рзы инанагӡо ароль атәы азгәеиҭеит.

«Шәара, Аԥсны ауаажәларра рыҩнуҵҟа аҭышәынтәалареи адиалоги ргарантк иаҳасаб ала иалшәыршеит иахьа ареспубликазы аныҳәатә усмҩаԥгатә ҟалартә. Агәра шәҳаргоит Урыстәылатәи Афедерациа Апарламенти Афедерациатә Хеилаки еснагь ишшәывагыло азы. Урыстәылатәи Афедерациа Апарламент Аԥсны аринахыстәи аҿиаразы системала, иааиԥмырҟьаӡакәа аԥснытәи аколлегацәеи иареи реимадара мҩаԥнагалоит, ареспублика иқәынхо милаҭрацәала еилоу ауааԥсыра зегьы рзы хра аманы иҟаларц азы», – ҳәа иҳәеит Аҳәынҭқарратә Дума аиҳабы ихаҭыԥуаҩ Пиотр Толстои.

Ахәҭакахьала, Андреи Картаполов, Урыстәыла Аԥсны ахаҭарнакцәа Арратә операциа ҷыда ралахәхара даара ахә ҳаракны ишыршьо азгәеиҭеит.

«Урыстәылатәи Афедерациа Аԥсны ахаҭарнакцәа Урыстәыла аруаа ирывагыланы хацәнымырха иаҳзеиԥшу аҵакдуқәа рыхьчара иахьазықәԥо ахә ҳаракны иашьоит», – ҳәа иҳәеит иара.

«Ҳаԥхьаҟа аус бзиақәа рацәаны иаҳзыԥшуп. Ҳәарада, ҳколлегацәа ишырҳәаз ала, сара сгәыӷуеит урҭ зегь рыла алҵшәа бзиақәа аарԥшхап ҳәа. Аԥсны Апарламент уи анагӡаразы иалшо зегь ҟанаҵалоит», — ҳәа аиԥылара ахыркәшамҭаз инаҵшьны иазгәеиҭеит Лаша Ашәба.