Азҿлымҳара арҭеит астратегиатә еиҩызара аинфраструктуреи афымцамчи русхк аҟны, иара убас Аԥсны атәылауаа адгылара рыҭара азҵаара, административтә процедура армариара убрахь иналаҵаны, ҳәа адырра ҟанаҵоит Аҳәынҭқарра Ахада ипресс-маҵзура.

Сергеи Кириенко Аԥсны Ахада ииҭеит Иоанн Златоуст иныхачаԥа. «Сара сзы ари иҷыдоу символуп - Аԥсны сара стәылоуп, Нижни Новгород аҩбатәи сыԥсадгьыл ауп. Ари аныхачаԥа рҩит Нижегородтәи аепархиа аҟазацәа, Аԥсны абираҟ аԥшшәқәа хархәара рыҭаны», - ҳәа иҳәеит Сергеи  Кириенко.

Гәынба Бадра аҳамҭа  иҭабуп ҳәа ахиҳәааит, иамоу асимволтә ҵакы азгәаҭаны. «Ари аҳамҭа еиднкылоит ҳажәларқәа рдоуҳатә қьабзқәа. Иара убас Урыстәылеи Аԥсни ирыбжьоу аиҩызара арӷәӷәоит», - ҳәа иҳәеит атәыла Ахада.

Аԥсны Аҳәынтқарра Ахада Урыстәыла Ахада Иусбарҭа Анапхгаҩы Актәи ихаҭыԥуаҩ ҳамҭас ииҭеит аҳәызбеи амилаҭтә шәҵатәи. Аиԥылара ахыркәшамҭазы еиуеиԥшым ахырхарҭақәа рыла аганқәа аԥхьаҟатәи аусеицура иадҳәалаз азҵаарақәа шьақәдырӷәӷәеит.