Аҟәа. Хәажәкырамза 11, 2025 шықәса. Аԥсныпресс. Аԥсны аҵара Аминистрраҿы аҵара аминистр инапынҵақәа назыгӡо Инал Габлиеи Урыстәылатәи ахәыҷтәы-қәыԥштә Центр анапхгаҩцәеи реиԥылара мҩаԥысит.
Ацентр адиректор Алеқсандр Кудриашиов зхадараҿы дыҟоу аделегациа аилазаараҿы иҟоуп Ацентр аусзуҩцәа Геннади Кириченков, Анна Сергутина, Анна Зассеева, Дариа Фоменко.
Аиԥылара иалахәыз Москва Ахәыҷтәы-қәыԥштә Центр Урыстәыла ашколқәеи аколлежьқәеи рҿы иаланагало еиуеиԥшым ааӡаратә практикақәа, аҭаацәаратә еилазаареи ахәыҷытә еидгыларақәеи рымадара аметодқәа, ирылацәажәеит.
Аҵара аминистр инапынҵақәа назыгӡо Инал Габлиа асасцәа дырԥыло аҭыԥантәи арҵаҩцәеи аҵаҩцәеи рзы хра злоу аҟазара-классқәа мҩаԥызгз «Движение первых» ахаҭарнакцәа ааигәа Аԥсныҟа иааны ишыҟаз иҳәеит.
«Сара гәахәарыла исыдыскылоит шәара ҩаԥхьа шәбара. Агәра ганы сыҟоуп ҳусеицура аҳәаақәа есымша аҽшарҭбало. Ҳара иазԥхьагәаҭаны иҳамоуп аиқәшаҳаҭра ҳабжьаҵара. Урыстәылатәи ахәыҷтәы-қәыԥштә Центр ҳара ҳзы ааӡаратә усураҿы иҿырԥшыганы иҟоуп».
Аԥсны аҵара аминистр инапынҵақәа назыгӡо иажәақәа рыла, ашколқәа рҿы ааӡаратә процесс иаҵоу аҵакы ахәыҷқәа ироуа адырра ҿыцқәа рҵакы акала еиҵаны иҟаӡам.
«Ҳара ахәыҷқәа ртәыла апатриотцәа атәылауаа иашақәеи раҳасабала рааӡара ахшыҩзышьҭа ду аҳҭоит, убри аус аҿы хра злоу аԥышәеимадара ҳақәгәыӷуеит», – ҳәа иҳәеит Инал Габлиа.
Урыстәылатәи ахәыҷтәы-қәыԥштә Центр ахада Алеқсандр Кудриашов убасҵәҟьа ашколқәа рҿы ааӡаратә усура амҩаԥгара, апатриоттә клубқәа раԥҵара, ашколтә театрқәа раартра аҵак ду аҵоуп ҳәа инаҵшьны иазгәеиҭеит. «Ааӡаратә усура азы аспециалистцәа ашколқәа рҿы ахәыҷқәа акультуреи аспорти рахь абзиабара рыларааӡоит, урҭ рыҿиаратә потенциал аарԥшра иацхраауеит», - ҳәа иазгәеиҭеит иара.
Алеқсандр Кудриашов Аԥсни Урыстәылеи аҵарадырреи аҿар рааӡареи рганахьала ирыбжьоу аусеицуратә еизыҟазаашьақәа еиҳагьы ишыӷәӷәахо азы агәыӷра ааирԥшит.
