«Сара уи изыулакгьы исхызгап, сыпсрым уи азы. Ас еиԥш аӡбамҭа адкылара ҟалеит ҳәа адырра аныҟалаз аухаҵәҟьа сара рыҽсымардеит иаразнак иакымкәа-иҩбамкәа Урыстәыла азиндырратә агентрақәа. Урҭ хәыда-ԥсада синтересқәа рыхьчараҿы ацхыраара сыдыргалеит.  Аха убри аан ҳара ҳиустициа Аминистрреи аомбудсмени рҟынтәи изеиԥшразаалак ацхыраара ҳбар ҳҭахын. Ҳара иҳамоуп иахәҭоу аусбарҭақәа жәпакы, иарбоу ахырхарҭақәа рыла аус зуа, иҳамоуп аинститутқәа. Дара рпозициа иаартны, Аԥсны азакәанԥҵара инақәыршәаны иаадырԥшыр ахәҭоуп», – ҳәа иҳәеит иара.

«Аԥсны аҩныҵҟатәи аусқәа Рминистрра, Аҳәынҭқарратә шәарҭадара Амаҵзура ҳара ҳганахьала изеиԥшразаалак аҽԥынкылара ыҟаӡам ҳәа урыстәылатәи аган адырра рнаҭар, усҟан уи ҳара ҳпозициақәагьы еиҳа иарӷәӷәон, аӡбарҭаҿгьы уахь иналаҵаны», – ҳәа игәаанагара иҳәеит Инал Ҳашыг.

Ауаажәларратә усзуҩ Ахра Бжьаниа, аҳәааҿы аанкылара, атәылауаҩра амхра, адепортациеи амасстә информциа ахархәагақәа рықәыӷәӷәара – ари иҟоу акоманда иазыманшәалоу алшарақәа раԥҵаразы атәыла аҿы ауаажәларра-политикатә ҭагылазаашьа аиҭакра азы хықәкык иазырхоу аусмҩаԥгатәқәа роуп. Иара агәра ганы дыҟоуп ари аҩыза ақәыӷәӷәара иахәҭоу азхьаԥшра амоур, Аԥсны анҭыҵтәи анапхгараҭара аиура ахь икылнагар алшоит.

«Ари реалла иҟоу ҭагылазаашьоуп, уи наҟ-наҟ еиҳагьы еицәахалоит. Ҳара анагӡаратә мчра аганахьала митәык агәыӷра ҳаманы иҟаӡам, убри аҟнытә Апарламент ахь ҳадҵаалеит.   Аԥхьабаҩыс аҟазаара аҭахӡам, анаҩстәи акшара азакәанԥҵаратә мчра аганахьала ишыҟало адырразы», – ҳәа иҳәеит Ахра Бжьаниа.

Иҟаҵатәузеи?

Дауҭ Хәытаба иқәгылоз рахь аҳәара ҟаиҵеит доусы ражәалагалақәа еиқәыршәаны ирҳәарц азы.

Ахра Бжьаниа Апарламент «зылҵшәадара нагӡаны иаазырԥшуа» аԥснытәи амаҵурауаа рмаҵуратә ҭыԥқәа рышьашәалара азы азҵаара ықәдыргыларц, Аԥсны иҟоу Урыстәыла ацҳаражәҳәаҩ ақәшаҳаҭымхаразы ажәанҵа ирҭарц азы абжьгара ҟаиҵеит. Иара убас, иара даара ихаданы иԥхьаӡоит атәылауаа аҵыхәтәантәи аамҭа азы анонимтә телеграмм-каналқәа рыцхыраарала активла аларҵәара зауз апиар еиқәаҵәа рацәыхьчара азы ауснагӡатәқәа раԥҵареи рынагӡареи алыршара

Инал Ҳашыг Урыстәылатәи Афедерациа аҳәаахьчаратә усбарҭақәа Аԥсны атәылауаа аҳәаа рахысраан раанкыларазы рхы иадырхәо адыррақәа рацәцара ҟалашьас иаиуз, насгьы уи хыҵхырҭас иамоу аилкааразы апарламенттә усеилыргара ахацыркра азы ажәалагала ҟаиҵеит.  

«Сара исҭахуп аԥсуа ҳәынҭқарра ахатә проблемақәа ахала иаӡбаларц, аҿыхԥса аҳасабала урҭ агәылара иҟоу аҳәынҭқарра ӡбатәыс иамҭакәан», – ҳәа иҳәеит иара.  

Азиндырҩы Ешсоу Какалиа убасҵәҟьа  ареспублика аҩныҵҟатәи азҵаарақәа рыӡбара азы аԥыжәаратә зин Аԥсны анапхгареи амчратә структурақәеи роуп изауша ҳәа иԥхьаӡоит.

«Жәлар Реизара-Апарламент иамоу ахылаԥшратә функциақәа иахьынӡауа ала инагӡаны ахархәара анаҭароуп. Акагьы аҟамҵара, амалатәара ариашара ҟалаӡом», – ҳәа иҳәеит иара.

Жәлар Реизара-Апарламент ԥыхьатәи адепутат Илиа Гәыниа Аԥсни Урыстәылеи рыбжьара ҩынттәи атәылауаҩра азы Аиқәшаҳаҭра цқьа анализ азура азы ажәалагала ҟаиҵеит.

Иқәгылаз реиҳараҩык Апарламент ареакциа афакт иаҵоу аҵакы ахадара азгәарҭеит.

Иара убас, адепутат Кан Кәарҷиа аоппозициа анагӡаратә мчра аусбарҭақәа аус рыцура ишазхиоу азгәеиҭеит. Ихымԥадатәиу аҭагылазаашьаны иҟоу акызаҵәык – Аҳәынҭқарра Ахада ила Аԥсны ахьыԥшымра арӷәӷәара иазырхоу аполитика амҩаԥгара ауп.

Аиԥылара аихшьаалақәа

Аҳәынҭқарра-зинтә политика азы апарламенттә Еилкы ахантәаҩы Дауҭ Хәытаба иҟаҵаз ажәалагалақәа данырзыӡырҩ ашьҭахь, азхьаԥшра аформақәа инҭырҳәцааны аус рыдулатәуп, иазхәыцтәуп, еиҳагьы аҭагылазаашьа амырбыжкра азы ҳәа инаҵшьны иазгәеиҭеит.

«Иахьа арахь ааԥхьара зауз рҟынтәи зегьы мааӡеит. Иҟалап ҳара даҽа еиԥыларак мҩаԥаагаргьы, еиҳа аилазаара аармаҷны, иарку аформат ала», – ҳәа иҳәеит  Дауҭ Хәытаба.

Аиԥылара аналага ашьҭахь иааз Жәлар Реизара-Апарламент Аиҳабы Лаша Ашәба аиԥылара ахықәкы ибзианы еилкаауп, адепутатцәа ажәалагалақәа зегьы ҭҵааны разгәаҭара хыфмԥада иҟарҵоит ҳәа иазгәеиҭеит.