«Иахьа абраҟа ҳара ҳнапала еиҭаҳҳараны иҟоу аҵиаақәа зегьы , – ари ҳаиҳабацәа рфырхаҵара ҳгәалазыршәо акакәны иҟоуп, уи адгьыл аҿы аԥсҭазаара аҳра аура иасимволуп. Абарҭ аҵлақәа иҳаҩсыз аамҭеи ҳаԥхьаҟатәи аамҭеи реимадара иасимволны иҟалааит», - ҳәа лажәа иацҵо иазгәалҭеит лара.
Мзииа Беииа иара убас инаҵшьны иазгәалҭеит аҭоурыхтә иашара аиқәырхара иаҵоу аҵакы ахадара, ас еиԥш иҟоу аусмҩаԥгатәқәа уи арӷәӷәареи аҭоурых аицакра азы аҽазышәарақәа ишырҿагыло азы агәыӷрагьы аалырԥшит.
Еизаз дрыдныҳәалеит иара убас Урыстәыла Ахада иҟны иҟоу ауаажәларратә проектқәа рзы Аусбарҭа аиҳабы Сергеи Новиков. Уи Аԥсны аҳҭнықалақь аҿы «Агәалашәара абаҳча» еиԥш иҟоу апатриоттә проектқәа рынагӡара шымҩаԥысуа атәы далацәажәеит.
Аԥшьаҩы Иоанн Ахьҿы ихьӡ зху аберҭыԥ ахылаԥшҩы аигумен Игнати Киут убасҵәҟьа еизаз зегьы иааиуа аныҳәа ду, Аџьынџьтәылатәи еибашьра Дуӡӡа аҿы Аиааира агара Амш 80-шықәса ахыҵра аныҳәа рыдиныҳәалеит.
Аусмҩаԥгатә иара убас рхы аладырхәит ауаажәларратә еиҿкаарақәа, аҵараиурҭақәа рҵаҩцәа.
***
Мҽхакы ҭбаала еиҿкаахо аекологиа-патриоттә акциа «Агәалашәара абаҳча» – есышықәса Аџьынџьтәылатәи еибашьра Дуӡӡа аҿы иҭахаз зегьы ргәалашәара ахьӡала 27 млн. шьапы ҵлақәа реиҭаҳарала имҩаԥысуеит. Акциа асимвол – афырхацәа ргәалашәара аҳаҭыр азы иԥсабаратәу абаҟақәа рцәырҵра – абиԥарақәа рымҭрашьҭрара, Аԥсадгьыл ахьчаҩцәа ргәалашәара анаунагӡатәра, иара убас атәыла абнатә беиара аиқәырхареи аиҭашьақәыргылареи иазырхоу ахықәкы нанагӡоит. Есышықәса аԥсабаратә баҟаны иҟоу аҵиаақәа еиҭарҳауеит урыстәыла асубиектқәа зегьы рҿы, иара убас аҳәаанырцәгьы. Акциа амҩаԥгара иалагеижьҭеит хәы-шықәса рыла агәалашәаратә баҳчақәа реиҭаҳара акциа рҽаладырхәхеит 78 адунеи атәылақәа рҟынтәи миллионҩыла хатәгәаԥхарауаа, урҭ еицхырааны еиҭарҳахьеит 130 млн. инареиҳаны агәалашәаратә ҵлақәа.
Жәларбжьаратәи акциа «Агәалашәара абаҳча», Автономтә Икоммерциатәым Аиҿкаара «Агәалашәара Абаҳча», уоыстәылазегьтәи ауаажәларратә еиҿкаара «Аиааира ахатәгәаԥхарауаа», иара убас Аиааира ар рԥызацәа ргәалашәара Афонд раԥшьгарала 2020 шықәса раахыс имҩаԥысуеит. Апроект Урыстәыла Ахада В.В. Путин инапынҵала инагӡахоит, уи 2020 шықәсазы Ржевтәи амемориал аҵакыраҿы раԥхьатәи аҵла еиҭеиҳаит. Акциа мҩаԥысуеит Урыстәыла аԥсабара Аминистрреи абнатә нхамҩа Афедералтә Агентреи алахәхарала амилаҭтә проект «Аекологиатә еизҳазыӷьара» адгылара аҭара ахьӡала имҩаԥысуеит.
