Аҟәа. Хәажәкырамза 7, 2025 шықәса. Аԥсныпресс. Аԥсны аԥыза-министр инапынҵақәа назыгӡо Владимир Делба аԥыза-министр ихаҭыԥуаҩ, атәыла атранспорти афымцамчи рминистр инапынҵақәа назыгӡо Џьансыхә Нанбеи Ареспубликатә Унитартә Наплакы «Аԥсны Аихамҩа» адиректор Хада Арсоу Ҷыҭанааи алархәны аусуратә еилатәара мҩаԥигеит.
Аиԥылара иалахәыз акурорттә аамҭахәҭа алагара инамаданы Аԥснытәи Аихамҩа аусура аиӷьтәра алыршареи лаҵарамза 1, 2025 шықәса инаркны афымцадәыӷба «Ласточка» Шәачантәи Аҟәаҟа аушьҭреи ирыдҳәалоу азҵаарақәа ирылацәажәеит.
Афымцадәыӷба «Ласточка» Аҟәаҟа аԥышәатә реис уажәы Шәачеи Аҟәеи ирыбжьоу амҩа 3 сааҭи 20 минуҭи агозар, афымцадәыӷбала уи акыр ишеиҵахо аанарԥшит. Уи азгәарҭеит аԥышәатә реис зхы алазырхәыз Урыстәыла Аихамҩа анапхгараҭара ахаҭарнакцәагьы.
Владимир Делба Аԥснытәи Аихамҩа анапхгараҭара аҵыхәтәантәи ашықәсқәа рзы аихамҩатә инфраструктура аиӷьтәразы имҩаԥнаго аусуразы иҭабуп ҳәа реиҳәеит, убри аан уи аусура атемпқәа еиҳагьы ирыцҵатәуп ҳәа иазгәеиҭеит.
