Print this page
21.Жәабран.2025

Гәыли Кьычба Аҳәынҭқарра Ахадарахь акандидатцәа ҭынч, ахачҳареи ахарахәыцреи аарԥшны апровакациақәа рыҽрыламгалакәа алхрақәа рахь инеирц азы ааԥхьара ҟалҵеит.

Аҟәа. Жәабранмза 21, 2025 шықәса. Аԥсныпресс. Аиҿкаара «Аԥсны анацәа аҭынчреи асоциалтә иашареи рзы» ахантәаҩы, Аԥсны Ауаажәларратә Палата амаӡаныҟәгаҩ  Гәыли Кьычба, 1992 – 1993шш. Аԥсны жәлар Рџьынџьтәылатәи еибашьра аҿы зԥацәеи зыԥҳацәеи ҭахаз анацәа рыхьӡала, Аҳәынҭқарра Ахадарахь акандидатцәа Адгәыр Арӡынбеи Бадра Гәынбеи рахь ааԥхьара ҟалҵеит.

«Аԥсны аҵыхәтәантәи аамҭазы ишьақәгылаз иуадаҩу, аибарххара зныԥшуа ауаажәларра-политикатә ҭагылазаашьа азы агәҭынчымра аарԥшуа, аҭынчреи аҭышәынтәалареи реиқәырхареи ҳажәлар реидкылареи рзы, ҳажәлар ахақәиҭреи ахьыԥшымреи иахҭнырҵаз еилкааны, еиҵагыло аҿар рабиԥара гәыҵхас иҟаҵаны, ҳҳәынҭқарра ԥхьаҟатәи аԥеиԥш сазхәыцны, Аҳәынҭқарра Ахадарахь  акандидатцәа ҭынч, ахачҳареи ахарахәыцреи аарԥшны апровакациақәа рыҽрыламгалакәа алхрақәа рахь инеирц азы ааԥхьара ҟасҵоит», – ҳәа иазгәалҭеит лара.

Гәыли Кьычба ажәалагала ҟалҵоит аиааира згаз акандидат акомпромисс ҳасабла егьи акандидат аԥыза-министр имаҵура идигаларц.

Уи илгәалалыршәеит 2004 шықәсазы «Сергеи Уасил-иԥа Багаԥшьи Рауль Џьумка-иԥа Ҳаџьымбеи ирыбжьарҵаз аиқәшаҳаҭра усҟан аполитикатә еибарххара шыхнаҽыз, иҟалар зылшоз ажәлар ӷәӷәала реидыслара ишахнарԥаз».

«Ҳара ҳастратегиатә партниор, ҳгарант – Урыстәылатәи Афедерациа зегьы раԥхьаӡа иргыланы иаҭахуп ари арегион аҿы аҭынчреи аҭышәынтәалареи аҳра руа иҟаларц.

1992-1993 шш. рзы Ҳаԥсадгьыл агрессор иҟынтәи  ахьчара  уалԥшьаны ирыԥхьаӡеит иреиӷьу Аԥсны аҵеицәа, Аԥсны аԥҳацәа.  Аха иазгәаҭатәуп,  дара убри ала Урыстәыла аҳәаагьы рыхьчеит.

Ҳара – аиашьареи акзаареи, ҳтәыла иқәынхо амилаҭқәа зегьы – аԥсуаа, адыгаа, аерманцәа, аурысқәа, абырзенцәа, ақырҭцәа, агырцәа, аестонцәа, уҳәа реилибакаареи, милаҭрацәала еилоу Аԥсны жәлар ҳаизҳазыӷьара алзыршо акакәны ҳахәаԥшуеит», –  ҳәа илҳәеит лара.

Гәыли Кьычба ауаажәларра, Аҳәынҭқарра Ахадарахь акандидатцәа ралхратә штабқәа, Жәлар Реизара-Апарламент адепутатцәа, иҭахаз аибашьцәа ранацәа, аибашьра аветеранцәа, уҳәа зегьы иҟалҵаз ааԥхьара адгылара арҭарц аҳәара ҟалҵеит.

 

 

 

 

 


Read 643 times - Асабша, 22 Жәабран 2025 07:54