Print this page
20.Жәабран.2025

45 тонна амимоза Аԥснынтәи аиагаразы ашәҟәы иҭаргалеит шәачатәи аҳазалхыҩцәа.

Аҟәа. Жәабранмза 20, 2025 шықәса. Аԥсныпресс. Шәачатәи аҳазалхыҩцәа ашәҟәы иҭаргалеит 45 тонна инареиҳаны «ахьтәы» ашәҭ шьыҵәрақәа, ҳәа адырра ҟанаҵоит УА афедералтә ҳазалхратә Маҵзура Аладатәи аҳазалхратә Усбарҭа апресс-маҵзура.

Амимоза, мамзаргьы даҽакала иуҳәазар араӡны лакациа актәи апартиақәа сынтәа егьырҭ аамҭақәа иреиԥшымкәа даара изааны адәықәҵара иалагеит. Раԥхьатәи «ашәҭҭә» декларациақәа алагалан ажьырныҳәамза анҵәамҭазы.  Ишьақәгылаз аԥхарра ашәҭтә сезон заала алагара иацхрааит. Иҳаҩсыз ашықәсқәа рзы амимоза аиагара иалагон жәабран аҽеиҩшамҭа инаркны.

Иахьатәи аамҭазы аидарамҩангагатә транспорт ала аусдкылаҩцәа  Урыстәылаҟа ииаргахьеит 45,5 тонна ашәҭ. Иҳаҩсыз уахыки-ҽнаки рыла аҳазалхратә гәаҭара иахысит  2,6 тонна ари аҵиаа хкы амахәқәа. Амимоза еиҳарак иргоит Краснодартәи атәылаҿацә, Москва, Санкт-Петербург, ақалақьқәа рахь.

Лассы иԥхасҭахар зылшо ашәҭ аалыҵ иарку аҭрақәа рыла, ирхьшәашәоу арежим ала ииаргоит. Аҳазалхыҩцәа ирласны аҳәаа ахыжьразы рхы иадырхәоит адокументқәа реиҿкаара зырманшәало ирмариоу апроцедурақәа.

Атранспорттә хархәагақәа ракәзар аидара ақәымхыкәа, аҿыц технологиақәа рхархәарала агәаҭара мҩаԥыргоит.

Аиҳарак амимоза аиагара ҟалароуп жәабранмза анҵәамҭазы, хәажәкырамза актәи амшқәа рҟынӡа ихыркәшахароуп. 2024 шықәсазы Аԥсны иалганы импорт ҳасабла ииаргеит 240 тонн «ахьтәы» шәҭқәа.

Ҳазҭоу ашықәс азы амш бзиахар, иҳаҩсыз ашықәс азы ииагаз аҟара амимоза Аԥсны анҭыҵҟа агара алыршахар ҟалап.


Read 378 times - Ашәахьа, 10 Хәажәкыр 2025 23:49