Алеқсандр Новак: Аԥсни Урыстәылеи рыбжьара аинвестициатә еиқәшаҳаҭра аганқәа зегьы ринтересқәа аныԥшлоит.

06.Жәабран.2025

Алеқсандр Новак: Аԥсни Урыстәылеи рыбжьара аинвестициатә еиқәшаҳаҭра аганқәа зегьы ринтересқәа аныԥшлоит.

Аҟәа. Жәабранмза 6, 2025 шықәса. Аԥсныпресс. Бадра Гәынба Урыстәыла аԥыза-министр ихаҭыԥуаҩ Алеқсандр Новак диԥылеит. Урыстәыла аҩ-тәылак рыбжьара аинвестициатә еиқәшаҳаҭра уажәы ишыҟоу анагӡара шалымшо азы Аԥсны иқәнаргыло азԥхьанҵақәа иақәшаҳаҭуп, ҳәа аԥсуа политик диҿцәажәо аҳәамҭа ҟаиҵеит Урыстәыла аԥыза-министр ихаҭыԥуаҩ Алеқсандр Новак.

«Ҳара уи ахәаԥшра ҳазыхынхәуеит, жәаҳәарада, уи еиҟараны аҩ-ганк – аҩ-ҳәынҭқаррак руааԥсыреи абизнеси ринтересқәа аныԥшуазар ахәҭоуп,», — ҳәа иазгәеиҭеит иара.

Бадра Гәынба Аԥсны аринахысгьы Урыстәылантәи аинвестициақәа радыԥхьалара азы иманшәалоу аҭагылазаашьақәа раԥҵара иазку аусура ацҵахоит ҳәа инаҵшьны иазгәеиҭеит.

«Ҳара ҳзы ари даара акыр зҵазкуа хырхарҭаны иҟоуп. Убри аан, аинтерессқәа реибакапанра ахшыҩзышьҭра ду аҭазароуп. Уи аинвесторцәа ринтерессқәеи ҳтәыла ауааԥсыреи ҳҳәынҭқарреи ҳбизнесс еилазаареи ринтерессқәеи роуп. Ҳара Урыстәылантәи аинвестициақәа ралагалара ҳазҿлымҳауп. Аҵыхәтәантәи ашықәсқәа рзы инаҳагӡоз аусуцра аҳәаақәа ирҭагӡаны 25 миллиард мааҭ инарзынаԥшуа аинвестициақәа раҳасабала Аԥсны аекономика иалагалахеит. Аринахысгьы ҳара уи аусура ацҵаразы иманшәалоу аҭагылазаашьақәа раԥҵара ҳҽазаҳшәоит», — ҳәа инаҵшьны иазгәеиҭеит аԥсуа политик.

Read 267 times - Амҽыша, 09 Жәабран 2025 17:11