Аҟәа. Ԥхынгәымза 18, 2024 шықәса. Аԥсныпресс. Адунеизегьтәи аԥсуа-база жәлар Рконгресс аҿари абҩарҵәыратә культуреи рыҿиара аҟәшеи Аԥсны аҿари аспорти русқәа рзы Аҳәынҭқарратә Еилаки IX абаза жәлар Рыхәмаррақәа ирылахәхо аԥснытәи аспортсменцәа рԥылара мҩаԥыргеит.
Адунеизегьтәи аԥсуа-база жәлар Рконгресс аусзуҩцәа Валери Берзениеи Есма Кәыҵниаԥҳаи, иара убас Аԥсны аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба аделегациа ирыҿцәажәо урҭ рызҵаарақәа рҭак ҟарҵеит абжьгарақәагьы рырҭеит.
Абаза жәлар Рыхәмаррақәа – ари Аԥсни Ҟарачы-Черқьессиатәи Ареспублика абазаа ахьынхо аулқәеи ркомандақәа злаху аспорттә еицлабрақәа роуп.
2024 шықәсазы Ахәмаррақәа рымҩаԥгаразы иазалху ҭыԥны иҟалоит Ҟарачы-Черқьесиатәи Ареспублика Абазатәи араион аул Аԥсуа.
Акультура-спорттә фестиваль мҩаԥыслоит ԥхынгәымза 21- 23 рзы. Уи ҩ-хәҭакны ишьақәгылахоит: Абаза жәлар ркультура Амши Абаза жәлар Рыхәмаррақәа Рымши.
Абаза-жәлар ркультура Амш традициала ԥхынгәымза 23 рзы – Аԥсны Аҳәынҭқарратә бираҟ Амш иацызгәарҭоит.
