Аҟәа. Лаҵарамза 20, 2024 шықәса. Аԥсныпресс. Абырзен-римтәи еиқәԥара азы Аԥсны еизгоу акоманда аспортсменцәа Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рылахәхара аҽазыҟаҵара аҳәаақәа ирҭагӡаны, Ҟабарда-Балкариатәи Ареспублика аҿы Урыстәыла еизгоу акоманда иацны аҵара-ҽазыҟаҵаратә еизгақәа рхы аладырхәуеит.
Аизгақәа ирылагеит лаҵарамза 17 рзы. Урҭ рашәарамза 3 рҟынӡа имҩаԥыслоит.
Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа мҩаԥыслоит рашәарамза 12 – 23 рзы Казань ақалақь аҿы. Ари зымҽхак ҭбаау жәларбжьаратәи амультиспорттә турнир еиднакылоит Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа рҟынтәи 5 нызықьҩык инареиҳаны алахәылацәеи ааԥхьара зауз асасцәеи.
