Аҟәа. Мшаԥымза 1, 2024 шықәса. Аԥсныпресс. Аҳазалхратә Ҭыԥ «Адлер» аусзуҩцәа Аԥснытәи иааз автомашьына аҿы ирбеит 800 ԥатлыка инарзынаԥшуа аконтрабадтә ҩы. Амашьына азы аоперативтә информациа Шәача ақалақь Краснодартәи атәылаҿацә ала Урыстәыла Афедералтә шәарҭадара Амаҵзура Аусбарҭа аҟынтәи ироухьан.
Автомашьына асалон агәаҭараан аҳазалхыҩцәа Аԥсны азауадҭыжьратә ишкәакәоу аҩи аҩеиқәаҵәеи рбеит. Иаанкылаз аалыҵ азеиԥш капан тоннак рҟынӡа инаӡоит, ахәԥса акәзар – 500 нызықь мааҭ иреиҳауп, ҳәа адырра ҟанаҵоит Урыстәылатәи Афедерациа Афедералтә ҳазалхратә Маҵзура Аладатәи аҳазалхратә усбарҭа апресс-маҵзура.
Амашьына аԥсҟы зкыз ахаҵа ишазгәеиҭез ала, иарбоу арыжәтә иара ихатә хархәара азы аԥснытәи адәқьанқәа руак аҿы иааихәеит. Убри аан уи итауар аҳазалхратә шәҟәҭагалара иахымсӡеит.
Иарбоу арыжәтә зегьы аконфискациа азуп. Урыстәылатәи Афедерациа Ашьаустә Закәанеидкыла ахәҭаҷ 200.2, ахәҭа 1 (иџьбароу арыжәтә аконтрабанда) инақәыршәаны ашьаусеилыргара хацыркуп.
