Аҟәа. Хәажәкырамза 11, 2024 шықәса. Аԥсныпресс. Акультуратә форум «Арт-Курултай» аҳәаақәа ирҭагӡаны С.Ҷанба ихьӡ зху Аԥснытәи адраматә театр адиректор Хада Алхас Ҷолокуеи М. Гафури ихьӡ зху Башкортосҭантәи аҳәынҭқарратә академиатә театр адиректор Хада Иршаҭ Фаизулини аусеицуразы аиқәшаҳаҭра рыбжьарҵеит.
С.Ҷанба ихьӡ зху Аԥснытәи адраматә театр адиректор Хада Алхас Ҷолокуа IV акультуратә форум «АРТ-Курултай» атеатрал-концертә напхгаҩцәа рыплошьадка аҿы ажәахә ҟаҵо дықәгылеит.
«АРТ-Курултай» есышықәса Урыстәыла имҩаԥысуа акультуратә форум дуқәа ируакуп.
Есышықәса уи агеографиа амҽхак еиҳа-еиҳа аҽарҭбаауеит. Сынтәа Урыстәыла арегионқәа рнаҩс Афорум аусура рхы аладырхәит Аԥсны, Белорусиа, Ҟазахсҭан, Узбекьысҭан, Аладатәи Кореиа, Китаи, уҳәа егьырҭ атәылақәа рхаҭарнакцәа.
Афорум апленартә еилатәара рхы аладырхәит Ареспублика Башкортосҭан Ахада Ради Хабиров (авидеоеимадарала), Урыстәылатәи Афедерациа акультура аминистр Ольга Лиубимова, Башкортосҭан аԥыза-министр Андреи Назаров.
