Аҟәа. Жәабранмза 22, 2024 шықәса. Аԥсныпресс. Аԥсны атранспорттә прокуратура жәабранмза 16, 2024 шықәса рзы аԥсыӡкыгатә ӷба EMINOQULLARI 4NA341838 аҟынтәи Ҭырқәтәыла атәылауаа хҩык рыԥсреи иарбоу аӷба ԥшьҩык аекипаж алахәылацәеи ӷәӷәала акы рԥырхаганы Гагра араионтә хәышәтәырҭа Хада ахь рнагареи инамаданы апроцессуалтә гәаҭара мҩаԥнагоит. Абри азы адырра ҟанаҵоит Апрокуратура Хада.
Уажәазы аусеилыргаратә усбарҭақәа рыла аусеилыгаратә усмҩаԥгатәқәа мҩаԥыргоит, ахҭыс ахьыҟалаз аҭыԥ ахь инеины игәарҭеит, амедицина-ӡбаратә експертиза мҩаԥгахоит, ауаа рыҿцәажәара мҩаԥысуеит.
Иҟалаз амашәыртә хҭыс ҵаҵӷәыс иамаз аилкааразы ауснагӡатәқәа мҩаԥысуеит. Агәаҭарақәа рылҵшәақәа рыла апроцессуалтә ӡбамҭа рыдыркылоит.
