Ажәабжьқәа

Абиуџьет анагӡара, ашәахтә лагалақәеи иназыцҵоу ахәҧса азы ашәахтә: Алеқсандр Анқәаб аилатәара мҩаҧигеит

2739
08.06.2020 21:03
Абиуџьет анагӡара, ашәахтә лагалақәеи иназыцҵоу ахәҧса азы ашәахтә: Алеқсандр Анқәаб аилатәара мҩаҧигеит
Аилатәара рхы аладырхәит атәыла аҧыза-министр актәи ихаҭыҧуаҩ Беслан Џьопуа, аҧыза-министр ихаҭыҧуаҩ, афинансқәа рминистр Владимир Делба, аҧыза-министр ихаҭыҧуаҩ, аекономика аминистр Кристина Озган, ашәахтәқәеи аизгатәқәеи рзы аминистр Даур Кәырмазиа.

Аҟәа. Рашәарамза 8. Аҧсныпресс. Аҧсны Аҳәынҭқарра аҧыза-министр Алеқсандр Анқәаб  атәыла аҧыза-министр актәи ихаҭыҧуаҩ Беслан Џьопуа, аҧыза-министр ихаҭыҧуаҩ, афинансқәа рминистр Владимир Делба, аҧыза-министр ихаҭыҧуаҩ, аекономика аминистр Кристина Озган, ашәахтәқәеи аизгатәқәеи рзы аминистр Даур Кәырмазиа алархәны имҩаҧигаз аусуратә еилатәара аҿы абиуџьети, ашәахтә лагалақәа разҧхьагәаҭареи рынагӡареи, иара убас ашәахтә система аиӷьтәреи ирылацәажәеит.

Даур Кәырмазиа 2020 шықәса 5 мыз ирылагӡаны Ахылаҧшырҭа инанагӡаз аусура азы аҳасабырба ҟаиҵеит: “Ареспублика абиуџьет лаҵарамза иалагӡаны иалагалахеит 266 млн мааҭ. 5 мыз ирылагӡаны иалагалан 871 млн мааҭ,  еизган 849 млн мааҭ. Убас ала, 5 мыз рыла аплан анагӡара 97% рҟынӡа инаӡеит”.

Убри аан, аминистр алкаа ҟаиҵеит, рашәарамза 1 аҟынӡа ашәахтә шәатәқәа рыла иҟоу анамӡара астандартә шәагаақәа рҟынӡа инаӡеит, убас ала уи 102 млн мааҭ рыла ишьақәгылеит. Уи иаанаго иҳаҩсыз аамҭахәҭақәа рзы, ус иуҳәар ауазар, ашәатәқәа разымхарала иаҧҵаз ашәахтә резерв  еиҵахеит, 2019 шықәсагьы уахь иналаҵаны, ауалқәа ршәарала иааиуа амзқәа рзы ишьақәырӷәӷәоу аплан ахыхь анагӡара залымшахар ҟалап. Ҳаамҭазтәи ашәахтә анамӡара зегьы ааизакреи, рашәарамзазы ахыҧхьаӡаларақәа зегьы реицҵалыҵ иҳаҩсыз ашықәс азы аиҧш-зеиҧшу аамҭахәҭа азы иҟаз аасҭа еиҵамхар, усҟан ҳара 170 млн мааҭ еиҵамкәа аизгара ҳалҳаршоит. Аха, иахьатәи амш азы иҳаҩсыз амзақәа ирҿырҧшны ашәатәқәа реицҵалыҵ акыр еиҵахоит ҳәа заанаҵтәи агәаанагара ыҟоуп. Рашәарамза, 2020 шықәса рзы аплан ала иазҧхьагәаҭоуп  190 млн мааҭ”, – ҳәа иҳәеит Даур Кәырмазиа.

Убри инамаданы, аилатәара иалахәыз абиуџьеттә усхкы аусзуҩцәа руалафахәы рызшәара ҳасаб азуны иҟоу апроблемақәа заанаҵтәи разҧхьагәаҭара алыршахоит ҳәа алкаа ҟарҵеит.

Иара убас, аиҧылара аҿы иназыцҵоу ахәҧса азы ашәахтә аеффективра иалацәажәеит. Иназыцҵоу ахәҧса азы ашәахтә (ИАА) аеффективра аилкааразы имҩаҧгаз анализ аан атәыла абиуџьет ашьақәгылараан ашәахтә инанагӡо ароль ҳасаб азура адагьы, аҳәынҭқарра иамоу афинанстә лшарақәа абизнес адгыларазы аиҭеизшарагьы акырӡа аанагоит ҳәа инаҵшьны иазгәаҭан.

Алеқсандр Анқәаб апрофильтә хылаҧшырҭақәа рнапхгаҩцәа иназыцҵоу ахәҧса азы ашәахтә ахәҭаахьала ашәахтә система аусура, уи аефективра, иара убас иназыцҵоу ахәҧса азы ашәахтә (ИАА) ҳасаб азурала еиҧш, ҳасаб азурадагьы абиуџьет ашьақәгылараан иҟоу ашәарҭарақәеи, уҳәа анализ азура азы анапынҵақәа риҭеит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа