Ажәабжьқәа

Популярное

Жозе, Жужа ҳәа ахьӡ ҷыдақәа зырҭаз апума ҧшқақәа – аамҭа кьаҿ иалагӡаны Гагра аҿыцнхара рзыҧшуп

442
10.01.2018 12:12
Жозе, Жужа ҳәа ахьӡ ҷыдақәа зырҭаз апума ҧшқақәа – аамҭа кьаҿ иалагӡаны Гагра аҿыцнхара рзыҧшуп
Аусдкылаҩ, амеценат Витали Леиба, Аҧсныпресс акорреспондент диҿцәажәо абнатә цыгәқәа раахәара шииӡбызи, агәарҧлеи абнатә ҧстәқәеи реиҩызареи ртәы еиҭеиҳәеит.

Аҟәа. Ажьырныҳәамза 10. Аҧсныпресс. Лана Ҵәыџьҧҳа. Гәдоуҭа ақалақь, Аҧсны жәлар Рџьынџьтәылатәи еибашьра аветеран, Леон иорден занашьоу, иара убас аусдкылаҩ, амеценат Витали Леиба иҩнаҭа аҿы апума ҧшқақәа  ирызҳауеит. Жозе ҳәа изышьҭоу ацгәабеи Жужа ҳәа ахьӡ ҷыда змоу ацгәаҧси абар шьҭа ҧшьымзи бжаки рхыҵхьеит. Апума ҧшқақәа – аамҭа кьаҿ иалагӡаны Гагра аҿыцнхара  рзыҧшуп: Витали Леиба урҭ иҩыза ииҭараны дыҟоуп. Уи апума ҧшқақәа рзы  Гагра иҟоу исасааирҭа амҧан  ахкаара ҟаиҵахьеит.



Витали Леиба абнатә цгыгәқәа раахәара шииӡбаз атәы еиҭеиҳәеит: “Хәы-шықәсаҟа раҧхьа Гәдоуҭа игылаз аҩныжә аҭыҧан сара аҩны ҿыц аргылара напы асыркит. Уи иаҵаку адгьыл ахьырацәоуи, насгьы сара схала сахьынхоуи инарымаданы, ҧстәқәак анысҵарц сыӡбеит. Еиуеиҧшым авариантқәа санрыхәаҧш ашьҭахь апумақәа алысхит. Москва анҭыҵ иҟоу апитомникқәа руак аҿы ҩ-пумак аҿасҵеит. Ацгәаба Жак ҳәа ахьӡысҵеит, ацгәаҧс акәзар-уи Софи ҳәа ахьӡ ҷыда аиуит. Урҭ аҩныҟа ианаазга ашьҭахь, есымша сылаҧш рхын, анапы иасыршьцылон. Уажәы урҭ ҧшьышықәсеи бжаки рхыҵуеит, сара акыр исыдҳәалоуп, ибзиаӡангьыы сҳәатәы харҵоит. Ҧшьымзи бжаки раҧхьа Жозеи Жужуи  апума ҧшқақәа рхылҵит. Урҭ макьаназы ишәаҧырҳаҧуеит, унапаҿы иааиуа иҟам”.



Витали Леиба иажәақәа рыла, апумақәа адәаҿы иҟоуп, уаҟа ҷыдала урҭ рзы иҭыхкаау аҭыҧ ыҟоуп.  Аанда ҳаракуп, ҩбаны иҟоу агәашә аҿоуп.



Аҧшәма даныҟам апумақәа дырхылаҧшуеит уи ицхырааҩ Хемат.



Абнатә цыгәқәа мышкахьы знык акәац рфалароуп. “Аҳәажьы ада урҭ  егьырҭ акәац хкқәа зегьы рфар ҟалоит. Аҳәажьы иақәу ашша ахьырацәоу азы  апумақәа ирҿаҳҵаӡом. Акәац раҧхьа адизенфекциа азы мышқәак архьшәашәага иҭаҳҵоит. Иара убас апумақәа ирҵаау акәҭыжьгьы рҿаҳҵоит. Урҭ абҩа дуқәа рыда акгьы аанмыжькәа ирфоит. Амшын иҭоу аҧсыӡ апумақәа ирфаӡом. Уи агьама ргәамҧхозар акәхап”, – ҳәа еиҭеиҳәеит Витали Леиба.



Абнатә цыгәқәа рыҧшәма апумақәа даҽа ҩызакгьы дышрымоу атәы еиҭеиҳәеит – уи – Чопик ҳәа изышьҭоу агәарҧла ауп. Аха ари зназы иманшәаланы  ишьақәгылаз аиҩызара еиҧҟьагәышьеит. Избан акәзар, ахәмаррақәа рҿы  арҭ аҧстәқәеи аласбеи рыкапантә категориа зынӡа еиҟараӡам. “Ацгәаба Жак аласба иадгәыбзыҕлоит, аха уи митәык изгәамҧхо аласба Чопик  знык-ҩынтә пума иацҳаит. Уи акәхеит, сара саныҟамыз зны Жак аласба ахәдаҿы иааннакылан инас-аасит, маҷкгьы иаркәыкәит. Уажәы ҳара урҭ еидыганы иҳартәеит. Аха иҟалар ҟалап ҧыҭрак ашьҭахь, сара схылаҧшрала аласба ҩаҧхьа апумақәа рахь инаҳашьҭыргьы”, – ҳәа  еиҭеиҳәеит Витали Леиба.



Виталий Леиба  апумақәа зегьы рхатәы ҟазшьа рымоуп ҳәа иазгәеиҭеит. “Жак акәзар, уи алеишәа бзиоуп, уҳәатәы ханаҵоит, Софи – даҽакала иҟоуп, уи еиҳа  ицәыҵагызмалуп”. Витали Леиба иажәақәа рыла, егьырҭ аҧстәқәа макьана ранҵара азҧхьагәаҭаны ирымаӡам. "Апумақәа ахьыҟоу, егьырҭ аҧстәқәа рыҟазаара залыршахом. Урҭ иаразнак урҭ ирыхәхар алшоит”, – ҳәа еиҭеиҳәеит Витали Леиба.



Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа