Ажәабжьқәа

Уаҵәы Аҟәа ақалақь аҿы иаатуеит GRAND OPERA GALA

726
11.08.2017 14:23
Уаҵәы Аҟәа ақалақь аҿы иаатуеит GRAND OPERA GALA
Аҧсны аопертә естрада аеҵәахәқәа имҩаҧыргаз апресс-конференциа аҿы агәыҳалалратә проект GRAND OPERA GALA атәы иалацәажәеит.

Аҟәа. Нанҳәамза 11. Аҧсныпресс. Мадина Чагәааҧҳа. Апресс-конференциа аҿы Аҧсны акультуреи аҭоурыхтә-культуратә ҭынхақәа рыхьчара Аминистрра ахылаҧшрала еиҿкаахо агәыҳалалратә проект GRAND OPERA GALA  аиҿкааҩцәа имҩаҧысраны иҟоу аконцерт иалацәажәеит. 

Агәыҳалалратә проект GRAND OPERA GALA аиҿкааҩцәа иреиуоу, аопертә шәаҳәаҩы Саид Гобечиа апроект аҧҵара аҭоурых далацәажәеит: “GRAND OPERA GALA  анеиҿкаахоз аамҭа азы аҧснытәи аопертә шәаҳәаҩцәа ҿарацәа рыпроект ҳасабала акәын ишыҟаз. Сынтәа апрект 3 шықәса ахыҵуеит, уи змасштаб дуу концертны иҟалоит. Ииаиуа ашықәс азы ҳара апрект аҳәаақәа рырҭбаара ҳгәы иҭоуп, аҳәаанырцәынтәи артистцәа рааҧхьара азҧхьагәаҭаны иҳамоуп. Аконцерт рхы аладырхәраны иҟоуп 2 оркестрк: Аҧснытәи аҳәынҭқарратә камертә оркестри Шәачатәи асимфониатәи оркестри. Дерижиорцәас иамоуп Давид Терзиани Олег Солдатови. Иазгәаҭатәуп, аконцерт рхы аладырхәраны ишыҟоу аҧснытәи адраматә актиорцәа, Б. Шьукин ихьӡ зху урыстәылатәи аинститут аҿы аҵара зҵо – Милана Ломиаҧҳаи, Аманда Кәарацхелиаҧҳаи Аслан Киути. Апроект злалукааша акакәны иҟоуп уи хыҧхьаӡара рацәала атәыла аклассикатә музыкантцәа ахьеиднакыло”.

Аҧсны аҳәынҭқарратә камертә оркестр адерижиор хада, Аҧсны зҽаҧсазтәыз артист Давид Терзиан аконцерт апрограмма дахцәажәеит: “Аҧыжәара рымоуп италиатәи акомпозиторцәа, иҭынчу ашәаҳәареи анеаполитантәи ашәақәеи рҟынӡа. Иара убас еиуеиҧшым аҧсуа композициақәакгьы наҳагӡараны ҳаҟоуп, аувертиура арҳәарагьы азҧхьагәаҭаны иҳамоуп. Иахьа аҽазыҟаҵара хада мҩаҧысраны иҟоуп, араҟа аоркестрқәа  еилахәхоит. Усҟан ҳара ҳанагӡаҩцәа апроектқәа рҳәаақәа рырҭбаареи лассы-лассы ахәаҧшцәа рҿаҧхьа ақәгылареи рзы алшара роуеит. Чаиковски ишиҳәоз еиҧш, аопера ауаа еизааигәанатәуеит, ажәларгьы еиднакылоит”. 

Аҧснытәи аҳәынҭқарратә филармониа асолистка Нана Черқезиаҧҳа, апроект GRAND OPERA GALA итеатралтәу қәгылараны иахьыҟоу азы акыр ахшыҩзышьҭра аманы иҟалоит ҳәа иазгәалҭеит. “Сынтәа адраматә актиорцәа апроект рхы ахьаладырхәуа инамаданы, ҳара атеатр адунеи ҳзаатуеит. Ҳара ҳтәыла аҿы аопертә театр ыҟаӡам, аха ҳара уеизгьы аопертә-театралтә артистцәаны ҳаҟоуп, убри аҟнытә уи иашьашәалоу адекарациақәеи акостиумқәеи ҳацны асценаҿы ақәгылара азы агәазыҳәара ҳамоуп. Зыӡбахә ҳамоу аконцерт аҿы ҳара ус еиҧш алшара ҳауит”, – ҳәа инаҵшьны иазгәалҭеит Нана Черқезиаҧҳа.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа