Ажәабжьқәа

Популярное

Тоиво Клаар: зегьы ирзеиҧшу ахықәкы рымоуп – Женева имҩаҧысраны иҟоу аиҧылара излауа ала алҵшәа бзиа аиуртә иҟаҵатәуп

437
19.09.2019 09:19
Тоиво Клаар: зегьы ирзеиҧшу ахықәкы рымоуп – Женева имҩаҧысраны иҟоу аиҧылара излауа ала алҵшәа бзиа аиуртә иҟаҵатәуп
Аҧсны адәныҟатәи аусқәа Рминистрра аҿы аминистри Кавказнҭыҵ аҭышәынтәалареи ашәарҭадареи рзы Жәларбжьаратәи Женеватәи адискуссиақәа рыцхантәаҩцәеи реиҧылара мҩаҧысит.

Аҟәа. Цәыббрамза 19. Аҧсныпресс. Аҧсны адәныҟатәи аусқәа Рминистрра аҿы атәыла адәныҟатәи аусқәа рминистр Даур Ақаҩбеи Кавказнҭыҵ аҭышәынтәалареи ашәарҭадареи рзы Европатәи атәылақәа Реидгылареи Еиду Амилаҭқәа Реиҿкаареи, Европа атәылақәа ршәарҭадареи русеицуреи рзы Аиҿкаареи рганахьала Жәларбжьаратәи Женеватәи адискуссиақәа рыцхантәаҩцәа – Тоиво Клаари, Џьихан Султаноглуи, Рудольф Мичалки изаамҭанытәиу реиҧылара мҩаҧысит.

Аиҧылара аартуа, Аҧсны адәныҟатәи аусқәа рминистр Даур Ақаҩба Қырҭтәылеи Аахыҵ Уаҧстәылеи ирыбжьоу аҳәаа иаҧну ақыҭа Цнелис аҿы ишьақәгылаз аҭагылазаашьа аганахьала агәҭынчымра ааирҧшит.

Ахәҭакахьала, Аладатәи Кавказ иадҳәалоу азҵаарақәа рзы Европатәи атәылақәа Реидгыла иҷыдоу ахаҭарнак Тоиво Клаар аиҧылара иалахәыз агәра диргеит Аахыҵ Уаҧстәыла иҟоу аҭагылазаашьа, имҩаҧысраны иҟоу араунд аҿы ахшыҩзышьҭра ҕәҕәа шаҭахо.

“Қырҭтәылеи Аахыҵ Уаҧстәылеи рыбжьара ахалаҧшра ацәаҳәа иахьаҵанакуа ишьақәгылаз аҭагылазаашьа агәҭынчымра ҳазцәарнагоит, аха, аҩ-ганкгьы аҭагылазаашьа аҭышәынтәалара иазхиоуп. Жәаҳәарада, аҭынч ааҧхьарақәа рҟынтәи иконкрету ауснагӡатәқәа рахь аиасра хымҧадатәны иҟоуп, ҳаргьы иарбоу апроблема аӡбараҿы иахәҭоу ацхыраара аҭара ҳазхиоуп”, – ҳәа инаҵшьны иазгәалҭеит Жәларбжьаратәи Женеватәи адискуссиақәа рҿы Еиду Амилаҭқәа Реиҿкаара ахаҭарнак Џьихан Султаноглу.

Анаҩс аиҧылара алахәылацәа агуманитартә, аекологиатә шәарҭадара ҟазшьа змоу, уҳәа егьырҭ, имҩаҧысраны иҟоу Женеватәи адискуссиақәа  изаамҭанытәи араунд актуалра злоу азҵаарақәа ирылацәажәеит.

Имҩаҧысыз аиҿцәажәара иалагӡаны, Тоиво Клаар зегьы ирзеиҧшу ахықәкы рымоуп – Женева имҩаҧысраны иҟоу аиҧылара излауа ала алҵшәа бзиа аиуртә иҟаҵатәуп ҳәа инаҵшьны иазгәеиҭеит.

Кавказнҭыҵ аҭышәынтәалареи ашәарҭадареи рзы Женеватәи адикуссиақәа изаамҭанытәиу 49-тәи араунд амҩаҧгара азҧхьагәаҭоуп ажьырныҳәамза 8-9, 2019 шықәса рзы.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа