Ажәабжьқәа

Тамшьтәи адесант аӡхыҵра ҟалеижьҭеи 25-шықәса аҵра Тамшь ақыҭан иазгәарҭеит

153
02.07.2018 15:49
Тамшьтәи адесант аӡхыҵра ҟалеижьҭеи 25-шықәса аҵра Тамшь ақыҭан иазгәарҭеит
Тамшь, Ахьӡ-Аҧша амемориал аҿаҧхьа агәаларшәаратә митинг мҩаҧган.

Аҟәа. Рашәарамза 2. Аҧсныпресс. Мадина Чагәааҧҳа. Аҧсны Аҳәынҭқарра Ахада Рауль Ҳаџьымба, аҧыза-министр Геннади Гагәылиа, Очамчыреи Гали рраионтә Хадарақәа, Аҧсны атәылахьчара Аминистрра, Аказакцәа рырхәҭа, уаажәларратә еиҿкаарақәа рхаҭарнакцәа, Аџьынџьтәылатәи еибашьра аветеранцәа, ашколхәыҷқәа Тамшь, Ахьӡ-Аҧша амемориал амҵан ашәҭ шьыҵәрақәа шьҭарҵеит. Урҭ 25 шықәса раҧхьа Заур Зарандиа инаҧхгарала Тамшь ақыҭан иӡхыҵыз адесант иалахәыз 300-ҩык аибашьцәа ргәаладыршәеит.



Амитинг аҿы дықәгылауа, Аҳәынҭқарра Ахада инаҵшьны иазгәеиҭеит: “Ҳаҭыр зқәу ҳауаажәлар! Ҳаҭыр зқәу анацәа, абацәа, аишьцәа, аиҳәшьцәа, ҳауаажәлар зегьы!

Аиашазы, абарҭ амшқәа рзы, 25 шықәса рышьҭахь абра амцашоура иалагылаз шәоуп иахьа ара игылоу зегьы. Агәра згоит, хацәнымырха игылаз ҳарҭ ҳаҷкәынцәа, иара убас хатә гәаҧхарала иааны ҳауаажәлар ирыдгыланы еибашьуаз рыцхыраара ишабзоурахаз иаҳгаз Аиааира.

Аибашьра ашықәсқәа раан зегьы шәаӡәыкны шәышгылаз еиҧш, аҭынч ҧсҭазаарааҿгьы аҳәынҭқарра аргылара аҟны аӡәк иеиҧш шәеидгылазароуп. Рыхьӡ кашәара ақәымзааит зыҧсадгьыл зхы ақәызҵаз афырхацәа! Хьӡи-ҧшеи рыгымзааит Аҧсны ахьчаразы зхатәгәаҧхарала иааны иҳадгылаз зегьы! Иҟазааит наунагӡа ҳадгьыл аҿы аҭынчра, аидгылара, аизыӡырҩра, бзиа аибабара!

Абзиарақәа шәзеиҕьасшьоит! Иҭабуп!”



Аҧсны Аџьынџьтәылатәи еибашьра аветеран, Тамшьтәи амшынтә десант анаҧхгаҩы Заур Зарандиа иазгәеиҭеит: “Иахьа 300-ҩык ауаа рынасыҧ амшын ихҵаны ҳандәықәла нахыс 25 шықәа ҵит. Усҟан 11-ҩык ҳацәҭахеит, 38-ҩык рхәит. Аха иҳамаз адҵа наҳагӡеит. Иҭахаз рыҧсаҭа шкәакәахааит, зыҧсы ҭаны иаанхаз ишәыдысныҳәалоит ари амш!”



Ахәҭакахьала, Аџьынџьтәылатәи еибашьра аветеран, Тамшьтәи адесант иалахәыз Валери Зантариа еизаз арратә операциа аҽазыҟаҵара шымҩаҧысуаз атәы ргәалаиршәеит: “Заур Зарандиа ицны Гәдоуҭантәи иааит 300-ҩык ауаа. Ажәылара аиҽкаара бзианы аман. Адесант аӡхыҵра аӡиас Ҭоумышь амшын иахьалало аҭыҧ аҿы иҟалеит. Арантәи адесант ирҧыланы ирыцлеит Заза Занҭариеи Мираб Кьышьмариеи еиҽыркааз архәҭа. Жәаҳәарада, ахыи, абзарбзани, арҭҟәацгеи зқәу аҕба иҭоу ауаа рыҧсҭазаара  акыр ашәарҭара ду иҭагылоит.Аӷа идәықәиҵо арҭҟәацгақәа рҟынтәи акы заҵәык алашәар зыгьы-зегьы иарҭҟәацуеит. Ашәарҭа дуу шыҟазгьы, адесант ахықәкы нанагӡеит. Угәы унамырхьыр залшом иҭахаз ҳаибашьцәа, урҭ рҟынтәи иҟоуп иахьа уажәраанӡагьы зыбаҩ ҳзымҧшаац. Ажәыларақәа, аоперациақәа ирацәаны иҟан, аха ари аоперациа ҳахькылнагаз амҩа аанкылара, аҵыхәтәаны иаҳнаҭеит алыҵшәа бзиа-ҳаҧсадгьыл аҳҭнықалакь ахы иақәыиҭхеит, уи сара адунеи аҿы зегьы иреиҳау ҳамҭаны исыҧҳьаӡоит. Ари ахҭысқәа ҳгәалашәараҿы иаанхароуп, уи ҳара ҳҽар рхахьы иаҳзаагозар, даара акыр аҵанакуеит”.



Аусмҩаҧгатә ахыркәшамҭаз, Ахьӡ-Аҧша Амемориал аҿаҧхьа Аҧсны Арбџьармчқәа рырхәҭақәеи Аказакцәа рырхәҭеи аныҳәатә ииасра мҩаҧыргеит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа