Ажәабжьқәа

Популярное

Сергеи Будкеев: пицундатәи аорҕан иреиҕьӡоу европатәи аорҕанқәа ҩажәа рхыҧхьаӡараҿы иҟоуп

157
11.09.2017 14:47
Сергеи Будкеев: пицундатәи аорҕан иреиҕьӡоу европатәи аорҕанқәа ҩажәа рхыҧхьаӡараҿы иҟоуп
Цәыббрамза 12 инаркны цәыббрамза 17-нӡа Пицунда ақалақь аҿы имҩаҧысраны иҟоуп V аиубилеитә жәларбжьаратәи афестиваль “Пицунда аорҕантә хәылҧазқәа”.

Аҟәа. Цәыббрамза 11. Аҧсныпресс. Мадина Чагәааҧҳа. Имҩаҧысраны иҟоу афестиваль “Пицунда аорҕантә хәылҧазқәа” атәы имҩаҧгаз апресс-конференциа аҿы иалацәажәеит иарбоу аусмҩаҧгатә аиҿкааҩцәеи алахәылацәеи. 

Аҧсны жәлар рартистка, афестиваль аиҿкааҩ Марина Шамба  афестиваль апрограмма далацәажәеит: Ҳара ҳусура аконкурстә системала ишьақәгылаӡам, убри аҟнытә амузыкантцәа зегьы хаҭала иргәаҧхо апрограмма алырхуеит. Азыӡырҩцәа Бах, Франк, Сен-Санс, Лист, уҳәа рырҿиамҭақәа рыдгалахоит. Иара убас, раҧхьаӡа акәны Нодар Ҷанба ииҩыз “пицундатәи аорҕан азы Агимн” арҳәахоит. 

Аҳәынҭқарратә хортә капелла анаҧхгаҩы Нодар Ҷанба афестиваль аҷыдара аликааит: “Ари афестиваль ахьымҩаҧгахо азал иамоу ауникалра адагьы, уи алахәылацәа ргеографиатә ҵакырагьы ала иалукаауеит. Иара убас, сынтәа Аҧснытәи ахәаҧшыҩ уажәраанӡа имаҳацыз арҿиамҭақәа идгалахоит”. 

Аҧснытәи аҳәынҭқарратә филармониа асолист Лука Гаделиа, афестиваль аҳәаақәа ирҭагӡаны  2 концертк рымҩаҧгара игәы ишҭоу азгәеиҭеит. “Актәи аконцерт сара цәыббрамза 13 рзы Давид Терзиан наҧхгара зиҭо акамертә оркестр ирыцнасыгӡоит. Сара сзы уи даараӡа аҭакҧхықәра зцу усмҩаҧгатәуп, избан акәзар акомпозитор Франсис Пуленка ифундаменталтә усумҭа ала аконцерт лассы-ласы имҩаҧысӡом. Анаҩс, Бах иклассикатә орҕантә рҿиамҭақәа нагӡахоит”, – ҳәа иҳәеит Лука Гаделиа. 

Урыстәылатәи Афедерациа аҟазара зҽаҧсазтәыз аусзуҩ Сергеи Будкеев афестиваль иамоу афилософиатә ган азгәеиҭеит: “Есышықәса афестиваль ахь иаауа амузыкантцәа рхыҧхьаӡара еизҳауеит. Абри ауп ажәлар рдипломатиа ҳәа изышьҭоу, уи аҩаӡара апрофессионалтә дипломатиа аасҭа акыр еиҳауп. Сара сгәаанагарала, пицундатәи аорҕан иреиҕьӡоу европатәи аорҕанқәа ҩажәа рхыҧхьаӡараҿы иҟоуп. Уи ахьышьақәгылоу аныхабаа аҩныҵҟа иҟоу акустика Рига иҟоу Домтәи Аныхабаа иадукылартә иҟоуп”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа