Ажәабжьқәа

Рауль Ҳаџьымба Шьоҭа Арсҭаа “Ахьӡ-Аҧша” аорден актәи аҩаӡара ианеишьеит

121
13.06.2019 17:17
Рауль Ҳаџьымба Шьоҭа Арсҭаа “Ахьӡ-Аҧша” аорден актәи аҩаӡара ианеишьеит
Аҳәынҭқарра Ахада Рауль Ҳаџьымба академик Шьоҭа Арсҭаа дидикылеит.

Аҟәа. Рашәарамза 13. Аҧсныпресс. Дамеи Касланӡиа. Рашәарамза 13 рзы Аҧсны Аҳәынҭқарра Ахада Рауль Ҳаџьымба академик, афилологиатә ҭҵаарадыррақәа рдоктор, апрофессор, аҭҵаарадырра аусхк аҟны Г. А. Ӡиӡариа ихьӡ зху Аҳәынҭқарратә премиа алауреат Шьоҭа Арсҭаа “Ахьӡ-Аҧша” аорден I аҩаӡара ианеишьеит.

Аҳәынҭқарра Ахада иазгәеиҭеит Шьоҭа Арсҭаа аҭҵаарадырра, амилаҭтә бызшәадырра, арҵара-ааӡара ус аҟны илагаламҭа ду.

“Шәара шәеихьӡарақәа дуӡӡоуп аҭҵаарадырраҟны, аҿар реиҵааӡараҟны, аҧсуа бызшәа аиқәырхараҟны, аҳәынҭқарра есқьынгьы ахә ҳаракны иашьон Шәара имҩаҧыжәго аусура. Сара агәра згоит шәаҧхьаҟа аҭҵаарадырраҟны иҵегьы ишәылшо шырацәоу. Ишәзеиҕьасшьоит агәабзиара, агәамч, ақәҿиарақәа”, – ҳәа иҳәеит Аҳәынҭқарра Ахада.

Шьоҭа Арсҭаа Аҳәынҭқарра Ахада иҭабуп ҳәа иеиҳәеит.

“Аҭҵаарадырраҟны аӡәы имацара илшо маҷуп, адгылара иҭахуп. Иҭабуп ҳәа шәасҳәоит ас еиҧш аҳамҭа ҳаракы азы, уи сара сымацара сакәӡам, ҳҵарауаа зегьы, ҳинститутқәа ирызкуп. Зегьы ирылшо ҟарҵоит аҟнытә ари аҳамҭа зегьы иаҳзеиҧшуп”, – ҳәа иазгәеиҭеит Шьоҭа Арсҭаа.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа