Ажәабжьқәа

Популярное

Рауль Ҳаџьымба : сара Аҳәынҭқарра Ахада иаҳасабала, изеиҧшразаалак аилаӡарақәа рынагӡара сгәы иҭаӡам!

586
07.12.2016 15:19
Рауль Ҳаџьымба : сара Аҳәынҭқарра Ахада иаҳасабала, изеиҧшразаалак аилаӡарақәа рынагӡара сгәы иҭаӡам!
Аҳәынҭқарра Ахада Рауль Ҳаџьымба Ауаажәларратә палата алахәылацәа дырҧылеит.

Аҟәа. Ҧхынҷкәын 7. Аҧсныпресс. Елена Полуиан. Ауаажәларратә палата аилазаара ҿыц алахәылацәа дырҧыло, Аҳәынҭқарра Ахада Рауль Ҳаџьымба атәыла аполитикатә мчрақәа рыбжьара адиалог ашьақәыргылара аус аҿы ауаажәларратә еиҿкаара инанагӡо ароль акырӡа шаҵанакуа, насгьы уи аусура атәыла анаҧхгара аҟынтәи адгылара шаиуо азгәеиҭеит.

Аҳәынҭқарра Ахада Ауаажәларратә Палата ахықәкы хадақәа азгәеиҭеит. Урҭ иреиуоуп, раҧхьаӡа иргыланы, “азакәан апроектқәа рҕьырак аекспертизақәа рымҩаҧгара”.

“Заанаҵтәи азыӡырҩрақәа рҧышәа хацырктәуп. Ауаажәларра ирыдыркыло азакәан апроектқәа рзы адыррақәа роулароуп, Ауаажәларратә палата акәзар, уи иарбоу азакәан апроектқәа рҵаки рхықәки ауаажәларра рызнагара зылшо органуп”, – ҳәа иҳәеит Рауль Ҳаџьымба.

Иҩбахаз, Аҳәынҭқарра Ахада иажәақәа рыла, “Ауаажәларратә палата ауаажәларреи атәыла анаҧхгареи, иара убас, аполитикатә партиақәеи рыбжьара адиалог азы иплошьадканы иҟалароуп, Ауаажәларратә палата атәыла анапхгареи аоппозициеи иашьашәалоу аусшәҟәы анапаҵыҩра ахь рцәырҵразы алшамҭақәа зегьы лҵшәадахеит! Аха уи, зегьы хынҳәышьа амамкәа иҳацәцеит, азҵаарагьы ӡбышьа амаӡам ҳәа иаанагаӡом”, – ҳәа азгәеиҭеит Рауль Ҳаџьымба. .

Иара убас, Аҳәынҭқарра Ахада атәыла анаҧхгареи аҭыҧантәи ахаланаҧхгаратә усбарҭақәеи русеицура аҩаӡара аизырҳара, Ауаажәларратә палата аусура ахырхарҭа хаданы иаликааит.

Ахәҭакахьала, Ауаажәларратә палата амаӡаныҟәгаҩ Наҭелла Акаба иазгәалҭеит: “Ауаажәларратә палата Ахеилак иаднакылаз Аӡбара инақәыршәаны, ҳара атәыла аҧыза-министри Жәлар Реизара-Апарламент аиҳаби рышҟа аофициалтә шәҟәқәа дәықәаҳҵеит. Ҳара арҭ ашәҟәқәа рыла асоциал ҵакы змоу азакәан апроектқәеи апрограммақәеи рыдкылараан, Ауаажәларратә палата апрофильтә комиссиақәа алахәылацәа адыҧхьалара роуларц азы аҳәара ҟаҳҵеит. Арҭ акомиссиақәа рҿы ззанааҭдырра ҳараку ауаа шалоу хымҧада иазгәаҭатәуп”. Убри аан, уи, атәыла анаҧхгара азакәанҧҵаратәи анагӡаратәи амчрақәа рнаҧхгаҩцәа рҟынтәи ахәшьара ҳаракы шаиуз азгәалҭеит.

Иара убас, Наҭелла Акаба Ауаажәларратә палата атәыла анаҧхгареи аоппозициатә мчрақәеи рыбжьара адиалог ашьақәыргылара иадҳәаланы иҟоу аҧшьгара атәы азгәалҭеит: “Ауаажәларратә палата аҿы ас еиҧш адиалог амҩаҧгара зхахьы изго аусуратә гәыҧ аиҿкааразы аҧшьгара ҟаҳҵоит. Уи наҧхгара аиҭалоит Сократ Џьынџьал – ари ауаҩ, абар шьҭа шықәсыбжак ирылагӡаны алҵшәа аарҧшра иҽазишәоит. Ари аусура хымҧада иацҵатәуп. Зыӡбахә ҳамоу аусуратә гәыҧ инеитралтәу аполитикатә позициа иадгылоу ауаа алалароуп ҳәа агәаанагара сымоуп”.

Убри аан, Аҳәынҭқарра Ахада инаҵшьны иазгәеиҭеит: “атәыла аполитикатә мчрақәа рыбжьара адиалог ашьақәыргылара иазырханы Жәлар Реизара-Апарламент аҿы ирыдыркылаз аусшәҟәы ашьақәырҕәҕәара ахәҭаны исыҧхьаӡоит! Аха, сара Аҳәынҭқарра Ахада иаҳасабала еизеиҧшразаалак аилаӡарақәа рынагӡара сгәы иҭаӡам! Атәыла анаҧхгара акы ақәшаҳаҭхара адагьы, иҟоу аилагарақәа зегьы ҕәҕәала аҿагыларагьы алшозароуп!”

Сократ Џьынџьал ауаажәларра рыҩныҵҟа аилибакаара аҧшаара ахымҧадатәразы игәаанагара иҳәеит. “Аҳәынҭқарра ашьақәгылара ҳара ҳауп знапы иану. Иахьа хыҧхьаӡара рацәала аполитикатә партиақәеи аиҿкаарақәеи аҧҵахоит. Еиҳарак урҭ ицәырырго апрограммақәа аки-аки еиҧшуп, зегьы аҭынчреи аҭышәынтәалареи ишадгыло азы ажәахәқәа рҳәара иазҟазоуп. Арахь аҭынчра ыҟаӡам! Еиуеиҧшым аполитикатә мчрақәа рхаҭарнакцәа рхатәы интересқәа рыхьчара насҭха инышьҭаҵаны азеиҧш хра злоу ахырхарҭа анаӡаразы аусура иалагарц азы иахьа иҟаҵатәу арбану? Сгәы иаанагоит, дарбанызаалак ихаҟынтәи далагароуп, аиҿагыларатә ҭагылазаашьақәа раҧҵара мап ацәикроуп. Ҵабыргуп, ҳара иахьа даара ихьанҭоу аҭагылазаашьаҿы ҳаҟоуп, аха уи алҵшьа аҧшаара хымҧадатәиуп. Даҽа мҩакгьы ҳаманы избом: ма аиҿагылара, усҟан ауаажәларратә еибашьра алагашт, мамзаргьы адиалог аҧшаара аҽазышәара!”

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа