Ажәабжьқәа

Популярное

Рауль Ҳаџьымба: ҳҭоурых ҳдыруазароуп, зҭоурых ззымдыруа ҧеиҧш имаӡам

400
26.07.2019 17:25
Рауль Ҳаџьымба: ҳҭоурых ҳдыруазароуп, зҭоурых ззымдыруа ҧеиҧш имаӡам
Аҧсны Аҳәынҭқарра Ахада Рауль Ҳаџьымба Аҧсны Аҭҵаарадыррақәа ракадемиа Ахада Зураб Џьапуа дидикылеит.

Аҟәа. Ҧхынгәымза 26. Аҧсныпресс. Ҧхынгәымза 26 рзы Аҧсны Аҳәынҭқарра Ахада Рауль Ҳаџьымба Аҧсны Аҭҵаарадыррақәа ракадемиа Ахада Зураб Џьапуа дидикылеит.

Зураб Џьапуа Ахада адырра ииҭеит ашәҟәҭыжьра аус аҟны имҩаҧгоу аусура атәы. Еиҳа аҵакы змоу ҭыжьымҭоуп ҳәа иазгәеиҭеит аҧсуа жәлар рҵасқәеи ркультуреи иадҳәалоу, аматериал аизгаразы ицхыраагӡа дуны иҟало ашәҟәы “Азҵааранҵа”. Академик иажәақәа рыла, иара убас иҭыжьуп еицырдыруа аҵарауаҩ Колаковски ишәҟәы “Абаза материалқәа”, Аҧсны Аҭҵаарадыррақәа ракадемиа ашәҟәы “Вестник”, Аҧсны Аҭҵаарадыррақәа ракадемиаҟны имҩаҧысит академикцәеи акорреспондентцәа ҿыцқәеи ралхрақәа.

“Сара Киргизиа имҩаҧысуаз аепос иазку адунеизегьтәи асимпозиум аҟны сыҟан, уаантәи иаазгаз аинформациа зегьы ҳакадемикцәа ирысҭеит. Иарбоу аусмҩаҧгатә 23 тәыла рхаҭарнакцәа алахәын. Сара ара ицәырызгаз сусумҭа “Нарҭтәи аепос” атема иазкын”.



Зураб Џьапуа иара убас далацәажәеит 2020 шықәсазтәи абиуџьет: 

“Иаҳхысыз ашықәс азы Аҭҵаарадыррақәа ракадемиа аҵарауаа руалафахәқәа усҟан иахьынӡауаз ала ашьҭыхра азы аӡбамҭа ҳадаҳкылеит. Иахьа даҽа проблемак ыҟоуп, Аҧсны Аҭҵаарадыррақәа Ракадемиеи ҳинститутқәеи рыҟны иҟоуп ҳусураҿы зыда ҧсыхәа ҳамам, атехникатә персонал. Уаанӡа, егьырҭ ауалафахәқәа рышьҭыхра анымҩаҧысуаз ари азҵаара аӡбаразы алшара ыҟамызт, уажәы Академиа апрезидиум абри ажәалагала ахәаҧшразы аҳәара ҟанаҵоит. Ҳара иақәнагоу аусшәҟәы азҳархиахьеит.

Иҟоуп иара убас аҵарауаа рыҩаӡара иадҳәалоу азҵаарагьы. Иахьа здиссертациа зыхьчо аҵарауаа ироуа зынӡа имаҷуп. Иахьынӡазалшо ишьҭыхзар ҳҭахын. Абас аҳәара ҟарҵоит адиректорцәа”.

Аҳәынҭқарра Ахада арҭ азҵаарақәа ҳрыхәаҧшуеит ҳәа аҭак ҟаиҵеит.

“Ашәҟәҭыжьра атәы ҳҳәозар, уи акраҵанакуеит, иҭыҵуа ашәҟәқәа ахархәарагьы рымазароуп. Ҳҭоурых ҳдыруазароуп, зҭоурых ззымдыруа ҧеиҧш имаӡам. Аус здаҳулаша азҵаарақәагьы ыҟоуп, Аҧсны Аҭҵаарадыррақәа ракадемиа аекономика аҿиара азҵаарақәа иҵегьы зҿлымҳара анаҭалароуп.

Ауалафахәқәа рышьҭыхразы усҟан иҳалшоз зегьы ҟаҳҵеит. Аха аҳәынҭқарра алшарақәа есышықәса иазҳалароуп. Атехникатә персонали, акандидатцәеи, адокторцәеи руалафахәқәа рышьҭыхра азҵаара излауала хымҧада ҳахәаҧшуеит”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа