Ажәабжьқәа

Популярное

Рауль Ҳаџьымба: Наунагӡа хашҭра ақәымкәа иаанхоит асовет жәлари асовет архәҭақәеи анемец-фашисттә мпыҵахалаҩцәа ирҿагыланы ақәҧараҿы иаадырҧшыз агәымшәара!

448
09.05.2018 09:52
Рауль Ҳаџьымба: Наунагӡа хашҭра ақәымкәа иаанхоит асовет жәлари асовет архәҭақәеи анемец-фашисттә мпыҵахалаҩцәа ирҿагыланы ақәҧараҿы иаадырҧшыз агәымшәара!
Аҧсны Аҳәынҭқарра Ахада Рауль Ҳаџьымба Аџьынџьтәылатәи еибашьра Дуӡӡа аветеранцәа Аиааира Амшныҳәа рыдиныҳәалеит.

Аҟәа. Лаҵарамза 9. Аҧсныпресс. Лана Ҵәыџьҧҳа. Аҳәынҭқарра Ахада Рауль Ҳаџьымба 1941-1945 шш. Аџьынџьтәылатәи еибашьра Дуӡӡа аветеранцәа дырҧылеит. 

Аҳәынҭқарра Ахада аветеранцәа аныҳәамш рыдиныҳәало иазгәеиҭеит: 

Ҳаҭыр зқәу ҳауаажәлар! Ҳаҭыр зқәу ҳветеранцәа!

Гәык-ҧсыкала ишәыдысныҳәалоит иҧшьоу Аиааира Амш! Наунагӡа хашҭра ақәымкәа иаанхоит асовет жәлари асовет архәҭақәеи анемец-фашисттә мпыҵахалаҩцәа ирҿагыланы ақәҧараҿы  иаадырҧшыз агәымшәара! Миллионҩыла рхы ақәырҵеит аҭынчра, ахақәиҭра! Ҳара агәадура ҳнаҭоит Аҧсадгьыл ду ахьчара иазкыз ашьаарҵәыратә мҩа хьанҭа фырхаҵарыла иахьанысыз зықьҩыла Аҧсны аҵеицәа нагақәа !  

Мҽхакыла егьырҭ атәылақәа раасҭа акырӡа ишеиҵазгьы, 22 –ҩык Аҧсны аҳәынҭқарра  ахаҭарнакцәа хьӡырҳәагақәа  Асовет Еидгыла Афырхацәа ҳәа ахьӡ ҳаракқәа рҽаҧсартәит! Урҭ еиуеиҧшым афронтқәа рҿы хьаҵрак ҟамҵакәа, хацәынмырха еибашьуан.

Аибашьра ду аҭоурых аҿы хашҭра зқәым даҟьақәаны иаанхеит Кавказ ахьчара иазкыз афырхаҵаратә  хҭысқәа! Иара убас аҭыҧ ҷыда ааннакылоит атыл аусзуҩцәа тәамҩахә, лацәааихьшь ҟамҵа афронт иарҭоз ацхыраара!

Рыхьӡ кашәара ақәымзааит Аџьынџьтәылатә еибашьра Дуӡӡаҿы  Зыҧсадгьыл зхы ақәызҵаз зегьы! Агәамчи, ашықәсынҵыра дуи Анцәа ишәаҭәеишьааит аныҳәа ду иаҧыло  ҳветеранцәа! Иҟалааит аҭынчра, аманшәалара, ишәҭыкакаҷлааит ҳаҧсадгьыл Аҧсынтәыла! 

Аџьынџьтәылатәи еибашьра Дуӡӡа аветеранцәа ареспубликатә Хеилак ахантәаҩы Алексеи Шьониа ицеибашьуаз иҩызцәеи Аҧсны жәлар зегьи аныҳәа рыдиныҳәало иазгәеиҭеит: “Абџьар кны зыҧсадгьыл ахьчаразы игылаз зегьы аныҳәа шәыдысныҳәалоит. Усҟан аҭыҧ змаз агәаҟра уаҳа ахаангьы иҟамлааит. Ишәҭыкакаҷааит ҳаҧсадгьыл”.

Аџьынџьтәылатәи еибашьра Дуӡӡа аветеранцәа Аҟәа араион Ахеилак ахантәаҩы, Аҧсны Аџьынџьәтәылатәи  еибашьра аветеран Виссарион Ҷыҭанаа адныҳәаларақәа иҽрымидеит: “Иахьа ныҳәа дууп. Адунеи зегьы аҿы лаҵарамза 9 азгәарҭоит. Шәара иааҳзаажәгаз аиааира ахә ашьара уадаҩуп. Ҳаҧсы ҭанаҵы афашизм аиааира иасимволу ари аныҳәа пату ҳзақәзаауеит. Убасҵәҟьа, 1992 шықәсазы ҳгәаҳҽанӡамкәа иҳақәлеит ақырҭуа мпыҵахалаҩцәа. Аха ҳара ахьыҧшымра ахьчара ҳалшеит, анхара-анҵыра амҩа ҳанылеит. Гәык-ҧсыкала ишәзеиҕьасшьарц сҭахуп агәабзиареи аҭынч ҧсҭазаареи”.

Иара убас, Аџьынџьтәылатәи еибаәьра Дуӡӡа аветеран, Аеҵәа Ҟаҧшь аорден, Асовет Еидгыла Ахьӡ-Аҧша аорден  III аҩаӡара, Аџьынџьтәылатәи еибашьра аорденқәа  I , II аҩаӡарақәа, “Кавказ ахьчара азы”, ”Германиа аиааира азы” амедалқәа занашьоу Арсен Чакриан, аибашьра мҩа дшанылаз атәы игәалаиршәеит, иара убас уи Аҧсны ажәлар аҭынч ҧсҭазаареи аизҳазыҕьареи рзеиҕьаишьеит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа