Ажәабжьқәа

Популярное

Рауль Ҳаџьымба Кремльтәи ахан аҿы имҩаҧгаз аиҧыларақәа рлыҵшәақәа ртәы еиҭеиҳәеит: зҵаарақәак рыла, аамҭа кьаҿ иалагӡаны аусура иацҵахоит

743
05.12.2016 17:20
Рауль Ҳаџьымба Кремльтәи ахан аҿы имҩаҧгаз аиҧыларақәа рлыҵшәақәа ртәы еиҭеиҳәеит: зҵаарақәак рыла, аамҭа кьаҿ иалагӡаны аусура иацҵахоит
Аҧсны Ахада Рауль Ҳаџьымба ажурналистцәа рзы имҩаҧигаз абрифинг аҿы Урыстәылатәи Афедерациа Апрезидент Владимир Путини иареи реиҧылара атәы еиҭеиҳәеит.

Аҟәа. Ҧхынҷкәын 5. Аҧсныпресс. Лана Ҵәыџьҧҳа. Абрифинг аҿы Рауль Ҳаџьымба Урыстәылатәи Афедерациа Апрезидент Владимир Путини иареи реиҧылараҿы ишьҭыхыз азҵаарақәа рҟынтәи, зегь реиҳа ихадаз дырзааҭгылеит. Аҳәынҭқарра Ахада урҭ еиуеиҧшым аблокқәа рыла еихишеит. Зегь раҧхьаӡа иргыланы, уи аекономикатә усеицура иадҳәалоу азҵаарақәа роуп. Урҭ иреиуоуп: аихамҩатә кредит азы, уаанӡа иҟаз аиқәшаҳаҭра шьаҭанкыла аҧсахра, иара убас, уи ареструктуризациа азура, Аҧсны Амилаҭтә Банк ахашәалахәы зегьы иназыцҵоу акапитал ахь аиагаразы алшарақәа рыҧшаара иадҳәалоу ауснагӡатәқәа рымҩаҧгара. Иара убас, абизнес азы акредитқәа рыҭаразы алшарақәа рырҭбаара, аеропорт аиҭашьақәыргылара иадҳәалоу азҵаарақәа, аулафахәы аизырҳара иазырхоу иназыцҵоу афинанстәра амҩаҧгара.

Иҩбахаз: Урыстәылатәи Афедерациа Апрезиденти Аҧсны Ахадеи реиҧылара аҿы Аҧсны афымцамч аҿиара иадҳәалоу азҵаарақәагьы ирзааҭгылеит: “Иахьа ишьақәгылаз аҭагылазаашьа акыр иуадаҩуп! Атәыла аҿы афымцамч ахархәара есышықәса иазҳауеит. Аӡыхкыра аҿы аҭагылазаашьа уадаҩуп. Убри аан, ҳара ихшыҩркны афымцамч ахархәашьа ҳақәшәом, насгьы уи ахәҧса ашәара ҳҭахӡам. Аха хымҧада еилаҳкаар ахәҭоуп акы: уаҵәы, аӡеизакырҭақәа реиҭашьақәыргыларатә усурақәа рымҩаҧгаразы Егрытәи Аӡфымцастанциа аамҭала аусура аанкылара азҵаара анықәгылалак, Урыстәылатәи афедерациа аҟынтәи афымцалашара ашәагаақәеи, уи аагара атарифқәеи ҳрызхәыцыр акәхоит”, – ҳәа иҳәеит Рауль Ҳаџьымба.

Аха егьа ус иҟазаргьы, “атәыла фымцалашарада иаанхаӡом” ҳәа инаҵшьны иазгәеиҭеит Аҳәынҭқарра Ахада.

Иара убас, Рауль Ҳаџьымба иҟаиҵаз адыррақәа рыла, Кремльтәи ахан аҿы имҩаҧысыз аиҧыларақәа рҿы арратә усеицура азҵаарақәагьы ирылацәажәеит. “Ҳара иаку атәылахьчаратә контур ҳалацәажәеит. Ҳалацәажәеит, иара убас, Аҧсны Арбџьармчқәа иҿыцу атехникатә лшарақәа рыла аиқәыршәара азҵаарақәагьы”, – ҳәа иҳәеит иара.

Иара убас, аҩ-тәылак Рхадацәа аҳәаахьчаратә тематикеи атәылауаҩра азҵаарақәеи Аинформациатә Координациатә Центр, уҳәа ирыдҳәалоу азҵаарақәагьы ирылацәажәеит. Убри аан, Рауль Ҳаџьымба инаҵшьны иазгәеиҭеит: “зҵаарақәак рыла аамҭа кьаҿ иалагӡаны аусура иацҵахоит”.

Аҳәынҭқарра Ахада аиҧылара алҵшәақәа рзы адырра ҟаиҵеит: “аҧсуа ган аамҭа кьаҿ иалагӡаны, зҵаарақәак рыла аусура иацҵахап ҳәа агәыҕра рымоуп. Ҧхынҷкәын 8-9 рзы Анаҧхгарабжьаратәи акомиссиа аилатәара мҩаҧысраны иҟоуп”.

Иара убас, Рауль Ҳаџьымба анагӡара зауз аӡбарақәагьы дырзааҭгылеит. Уи иажәақәа рыла, “аихамҩатә кредит ареструктуризациа 2030 шықәсанӡа инаскьагоуп. Уи иҟаиҵаз алкаақәа рыла, “уаанӡа ирыдыркылаз, аихамҩатә мҩа аиҭашьақәыргылара иазырхаз иарбоу апроект, ҳара аҭагылазаашьа уадаҩ ҳҭанаргылеит. Ари ауал Аҧсны азы акыр ихьанҭоуп. Аха убри аан, акгьы ҟаҵамызт ҳәагьы аҳәара ҟалаӡом. Ҵабыргуп, аихамҩа ҳамоуп. Аха уи ала иныҟәо адәыҕбақәа рыццакра атәы зегьы иаадыруеит. Ҳаҧхьаҟа иҟаҵатәны ишьҭоу аусқәа акыр ирацәоуп, аха акы ҳалагаанӡа, иҳақәу ауал шәатәуп! Лассы-лассы ирҳәо уаҳауеит: “ҳара 2 миллиард мааҭ рҟынӡа инаӡо аихамҩатә кредит ҳақәуп ҳәа. Мап! Апроцентқәа рыцҵаны, уи зынӡа даҽакала иҟоуп. Убри зегьы ҳбиуџьет ҕәҕәала иақәыҕәҕәоит. Иҳаҩсыз 2-шықәса рыла аихамҩатә кредит аума, абанктә уал аума, ҳаҩныҵҟатәи ауалқәа роума, зегьы ааизакны уахәаҧшуазар, 900 миллион мааҭ рҟынӡа ашәара ҳалҳаршеит”.

Аеропот аиҭашьақәыргылара инамаданы, Рауль Ҳаџьымба иазгәеиҭеит: “Иарбоу аусура амҩаҧгара иазхиоу аструктурақәа рыҧшаара хымҧадатәиуп. Ҳара ари азҵаараҿы ацхыраара шҳарҭо азы агәра ҳдыргеит”.

Аҳәынҭқарра Ахада, еиуеиҧшым аҩаӡарақәа рҿы излацәажәо, Урыстәылатәи Афедерациа Апрезидент иажәақәа хазы дырзааҭгылеит: “даара ибзианы еилукааратәы иҳәан урҭ ажәақәа: “ара иахьа Аҧсны аҩныҵҟа имариам аполитикатә хҭысқәа шымҩаҧысуа жәаҳәарада иаабоит”. Иаразнак исҳәар сҭахуп, уи иарбанызаалак аҳәынҭқарраҿы аамҭа-аамҭала аҭыҧ зауа хҭысқәоуп, аха ҳара Аҧсны ишьақәгыло аҭагылазаашьа азинтә ҳәаақәа ирҭагӡахап ҳәа даара агәыҕра ҳамоуп. Ус анакәымха, ҳҳәынҭқаррақәа рыбжьара иазҧхьагәаҭаны иҟоу аекономикатә усеицура акыр иуадаҩхоит. Араҟа анегатив аҧшааара аҭахӡам! Ҳара уаанӡа ирыдыркылахьаз аусшәҟәқәеи ааигәа иҳабжьаҳҵаз Аиқәшаҳаҭрақәаеи рыла аус аауеит”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа