Ажәабжьқәа

Популярное

Рауль Ҳаџьымба Константин Затулини Александр Иушьенкои идикылеит

541
09.10.2019 22:31
Рауль Ҳаџьымба Константин Затулини Александр Иушьенкои идикылеит
Рауль Ҳаџьымба асасцәа аинаугурациа рхы ахьаладырхәыз азы ҭабуп ҳәа реиҳәеит, иара убас Аҧсни Урыстәылеи рыбжьара апарламенттә еимадара аҿиареи арҕәҕәареи иаҵоу аҵакы хада инаҵшьны иазгәеиҭеит.

Аҟҟәа. Жьҭаарамза 9. Аҧсныпресс. Аҧсны Аҳәынҭқарра Ахада Рауль Ҳаџьымба Урыстәылатәи Афедерациа Афедералтә Еизара I, V, VI, VII ааҧхьарақәа рдепутат, Ихьыҧшым Аҳәынҭқаррақәа Реиҩызара аусқәеи аидгьылуаа рымадареи рзы Аҳәынҭқарратә Дума Аилак ахантәаҩы актәи ихаҭыҧуаҩ  Константин Затулини, “Урыстәылатәи Афедерациа Акоммунисттә Партиа” аҟынтәи Урыстәылатәи Афедерациа Аҳәынҭқарратә Дума адепутат Александр Иушьенкои идикылеит.

Рауль Ҳаџьымба асасцәа аинаугурациа рхы ахьаладырхәыз азы ҭабуп ҳәа реиҳәеит, иара убас Аҧсни Урыстәылеи рыбжьара апарламенттә еимадара аҿиареи арҕәҕәареи иаҵоу аҵакы хада  инаҵшьны иазгәеиҭеит. “Акыр аҵанакуеит арҭ аимабзиаратә еизыҟазаашьақәа рыҿиара аҧсуа, аурыс жәларқәа реизҳазыҕьаразы”, – ҳәа инаҵшьны иазгәеиҭеит Аҳәынҭқарра Ахада.

Константин Затулин Рауль Ҳаџьымба Аҳәынҭқарра Ахада имаҵура официалла идкылара идиныҳәалеит, ари аҭакзыҧхықә маҵураҭыҧ аҿы ақәҿирақәеи аихьӡарақәеи  изеиҕьаишьеит.

“Ҳара иахьа ари аныҳәатә усмҩаҧгатә ҳхы алаҳмырхәыр алшомызт. Ҳара Аҳәынҭқарратә Дума аҿы Аҧсны аизыҟазаашьақәа ирыдҳәаланы иқәыргылахо азҵаарақәеи аиқәшаҳаҭрақәеи зегьы адгылара рыҭара азы иҳалшо зегьы ҟаҳҵалоит”, – ҳәа иҳәеит Константин Затулин.

Александр Иушьенко убасҵәҟьа Аҳәынҭқарра Ахада имаҵура адкылара идиныҳәалеит.

“Шәара иахьа ишәыдышәкылаз амаҵура атәыла анаҩстәи аҿиараҿы иалххо ахырхарҭазы акырӡа аҵанакуеит. Шәара иҭкааны, гәыкала иҟоу аусқәа рҭагылазаашьа шәалацәажәеит. Алхрақәа рымҩаҧысшьа атәы уалацәажәозар, урҭ сара сгәаанагарала, Кавказтәи арегион аҿы мацара акәымкәа, иааидкыланы адунеи ахьынӡанаӡааӡо аҿы зегьы раасҭа идемократиатәу алхрақәа ракәын ҳәа уҳәар алшоит”, – ҳәа инаҵшьны иазгәеиҭеит Александр Иушьенко.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа