Ажәабжьқәа

Популярное

Рауль Ҳаџьымба: атәыла абиуџьет аҕьырак аҳазылхратә шәатәқәа рыла ихарҭәаахоит

535
26.09.2016 13:42
Рауль Ҳаџьымба: атәыла абиуџьет аҕьырак аҳазылхратә шәатәқәа рыла ихарҭәаахоит
Аҧсны Аҳәынҭқарратә ҳазылхратә Еилакы аҧҵара 25-шықәса ахыҵра азгәаҭара аламҭалазы, Аҧсны Ахада Рауль Ҳаџьымба зҽалызкааз ахылаҧшырҭа аусзуҩцәа иҷыдоу изаамҭанытәиу иҷыдоу ахьӡқәеи аҳамҭатә дыргақәеи ранеишьеит.

Аҟәа. Цәыббрамза 26. Аҧсныпресс. Ирена Џьопуаҧҳа. Аныҳәатә еиҧылара аартуа, Аҧсны Ахада Рауль Ҳаџьымба Аҧсны Аҳәынҭқарратә ҳазылхратә Еилакы аколлектив рзанааҭныҳәа рыдиныҳәалеит.

Рауль Ҳаџьымба инаҵшьны иазгәеиҭеит: “Иахьатәи атәыла абиуџьет аҕьырак аҳазылхратә шәатәқәа рыла ихарҭәаахоит”.

Аҳәынҭқарра Ахада Аҧсны аҳәынҭқарратә ҳәаа ахьчараҿы рлагала азгәеиҭеит. “Амаҵзура назыгӡоз арҧарцәа рацәаҩны, Егры аӡиас ала иҟоу аҳәынҭқарратә ҳәааҿы ашәарҭадара иахылаҧшуа ахәҭақәа ирыцны аусмҩаҧгатәқәа рынагӡара рхы ақәырҵеит. Иахьагьы, ианаҭаха аамҭазы ҳара ҳҳазылхратә структурақәа русзуҩцәа лак-ҩакрада ҳтәыла аинтересқәа рыхьчаразы ишгыло агәра ганы сыҟоуп. Аха аҳазылхыҩцәа русуратә ҭыҧқәа рҿы аҳәынҭқарра аизҳазыҕьара иазырхоу аусура нарыгӡалар еиҳа еиҕьуп. Избан акәзар, шәара шәусура аҩаӡара ҳауаажәлар рыҧсҭазаара ахаҭабзиара иузаҟәымҭхо иадҳәалоуп”, – ҳәа Аҧсны Аҳәынҭқарратә ҳазылхратә Еилакы аусзуҩцәа рахь ихы рханы иҳәеит Аҳәынҭқарра Ахада Рауль Ҳаџьымба.

Ахәҭакахьала, Аҳәынҭқарратә ҳазылхратә Еилакы анаҧхгаҩы инапынҵақәа назыгӡо Даур Кәабахьиа атәыла анаҧхгара Аилак ианаҭо ацхыраареи адгылареи рзы Аҧсны Ахада ҭабуп ҳәа еиҳәеит. Уи иазгәеиҭеит: “Аҳазылхратә Еилакы аҿаҧхьа игылоу ауадаҩрақәа ртәы зеиҕьаҟам ала издыруеит. Исҳәарц исҭаху, ҳара ҳганахьала ҳусура ҿы иҟоу агхақәа рырҽеиреи уи аҩаӡара аизырҳареи, иара убас атәыла анаҧхгара аҟынтәи иҳауз агәрагара аҧсахареи рзы иҳалшо зегьы аҟаҵара ҳазхиоуп”.

Аҳәынҭқарра Ахада Герман Барцыц, Ушанги Кәыҵниа, Владимир Ҭаниа атәыла аекономикатә шәарҭадареи аекономикатә интересқәеи рыхьчара аус аҿы рлагалазы “Ҳаҭыр зқәу аҳазылхра аусзуҩ” ҳәа ахьӡ змоу адырга ҷыдақәа ранеишьеит.

Аслан Џьынџьал, Назыбеи Џьуӷьелиа, Ҭамара Иуанба, Ахра Лакәытаа, Татиана Повалиаева амаҵзуратә уалҧшьа иҿырҧшыгоу анагӡара азы“ Зҽалызкааз аҳазылхратә усзуҩы” ҳәа ахьӡ змоу адырга ҷыдақәа ранеишьахеит.

Аҧсны Ахада иҭижьыз Аусҧҟа инақәыршәаны, Аҳәынҭқарратә ҳазылхратә Еилакы анаҧхгаҩы актәи ихаҭыҧуаҩ Мсоусҭ Шамба аҳазылхратә маҵзура аинрал-маиор ҳәа изаамҭанытәиу ахьӡ ҷыда ианашьоуп.

Аҳәынҭқарратә ҳазылхратә Еилакы Аусбарҭа “Гал” анаҧхгаҩы ихаҭыҧуаҩ Сергеи Гадлиа Аҳазылхратә маҵзура аполковник ҳәа изаамҭанытәиу ахьӡ ҷыда ианашьоуп.

Иара убас, Ахәҭакахьала, Аҳәынҭқарратә ҳазылхратә Еилакы анаҧхгаҩы инапынҵақәа назыгӡо Даур Кәабахьиа ишазгәеиҭаз ала, традициала ишаҧу еиҧш, аиубилеитә рыцхәқәа рзы егьырҭ аструктурақәа рхаҭарнакцәагьы ахылаҧшырҭатә ҳамҭақәа ранашьахоит. Убас ала, Даур Кәабахьиа, Аҧсны Ахада Иусбарҭа ахада аамҭала инапынҵақәа назыгӡо Дмитри Шамба “Аҳазылхратә усеицура арҕәҕәаразы” ҳәа ахьӡ змоу амедал ианеишьеит.


(АП): Цәыббрамза 27, 1991шықәса рзы, Аҧсны Иреиҳаӡоу Асовет ахантәаҩы В. Г. Арӡынба иаҧшьгарала, Аҧсны Иреиҳаӡоу Асовет Ақәҵарала, Аҧснытәи ареспубликатә ҳазылхра еиҭашьақәыргылан. Ари арыцхә Аҧснытәи аҳазылхратә маҵзура иҿыцӡоу аҭоурых аҧҵара иадҳәалоуп. Анаҩс, 1994 шықәсазы, Аҧсны Аҳәынҭқарра Апрезидент Аҧсны аҳәынҭқарратә ҳазылхратә Маҵзура аҧҵаразы Аусҧҟҟа ҭижьит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа