Ажәабжьқәа

Популярное

Рауль Ҳаџьымба Аиҳабыра аҧхьатәара идикылеит

539
10.10.2019 13:55
Рауль Ҳаџьымба Аиҳабыра аҧхьатәара идикылеит
Змаҵура анагӡарахь инеиз Аҳәынҭқарра Ахада Рауль Ҳаџьымба атәыла аминистрцәа Реилазаара аофициалтә еилатәара мҩаҧигеит.

Аҟәа. Жьҭаарамза 10. Аҧсныпресс. Лана Ҵәыџьҧҳа. Аҳәынҭқарра Ахада Рауль Ҳаџьымба атәыла аминистрцәа Реилазаара аофициалтә еилатәара мҩаҧигеит. Араҟа уи аминистрцәа реилазаара иалоу рхы еилакны Аилазаара азинмчы ашьҭаҵара азы ирыдыркылаз арзаҳал инапы иаркхеит.

“Аҧсны Аҳәынҭқарра Ахада изы” Азакәан ахәҭаҷқәа 11, 12 инарықәыршәаны, аминистрцәа Реилазаара змаҵура анагӡарахь инеиз Аҳәынҭқарра Ахада иҿаҧхьа азинмчы ашьҭаҵара мҩаҧнагеит.  Аҧыза-министр Валери Бганба атәыла Анапхгара алахәылацәа зегьы инарыгӡаз аусуразы ҭабуп ҳәа реиҳәеит, ақәҿиарақәеи аманшәалареи рзеиҕьаишьеит.

Аҧсны Аҳәынҭқарра Ахада Рауль Ҳаџьымба «Аҧсны Аҳәынҭқарра Ахада изы” Аҧсны Аҳәынҭқарра Азакәан 11-тәи 12-тәи ахәҭаҷқәеи “Аҧсны Аҳәынҭқарра Аминистрцәа реилазаара (Аиҳабыра) азы” Аҧсны Аҳәынҭқарра Аконституциатә Закәан 6-тәи ахәҭаҷи инарықәыршәаны, Аҧсны Аҳәынҭқарра Аминистрцәа реилазаара аҧхьатәаразы Аусҧҟа инапы аҵаиҩит ҳәа адырра ҟаиҵеит. Убри аан уи  Аилазаара иалоу ирбаз аџьабаа азы ҭабуп ҳәа реиҳәеит: “Акритика жәпакы шыҟазгьы, ари Аҧсны Аминистрцәа реилазаара имҩаҧнагаз аусура маҷым. Арҭ ашықәсқәа зегьы аус зуаз, хаҭабзиарала зус назыгӡоз зегьы иҭабуп ҳәа шәасҳәоит. Иҟан аихьымӡарақәа, урҭ ҳҵәахуамызт, ҳара иазгәаҳҭон ҳаҧхьаҟа иҟаҵатәу шырацәоу, урҭ аҳасабтәқәа еиҳагьы ишыуадаҩқәоу атәы ҳҳәон. Ҳалшарақәа рыцҵаразы, реизырҳаразы иҳалшо зегьы шыҟаҵалатәу ҳазхәыцлароуп. Алшарақәа иҳамоугьы маҷӡам, ишақәнагоу ала аусура еиҿкаатәуп, урҭ алшарақәа ҳбиуџьет ахь инеиртә еиҧш. Аминистрцәа Реилазаара ҿыц аҿаҧхьа иқәгылоуп урҭ аҳасабтәқәа зегьы гәацҧыҳәарала рынагӡара. Ҳбиуџьет хаҳарҭәаалароуп, ҳҿаҧхьа иӡбатәны иқәгылоуп аҵак ду змоу аҳасабтәқәа. Ҳусушьа, ҳалшарақәа зеиҧшрахо еиҧш иҟалоит алҵшәақәагьы.

Иҭабуп ҳәа шәасҳәоит имҩаҧыжәгоз аусуразы. Иааидкыланы уи ҳтәыла ибзианы ианыҧшит, исуверентәу, ихьыҧшым аҳәынҭқарра аргылара ацҵаразы аҭагылазаашьа ҳнаҭеит”, – ҳәа иҳәеит Аҳәынҭқарра Ахада.

Аҳәынҭқарра Ахада аминистрцәа Реилазаара иҿыцу Аилазаара анаҧҵахо аҟынӡа аҭакҧхықәра аамҭала анагӡаразы анапынҵа аиҭеит. Аминистрцәа Реилазаара хаҭалатәи аилазаара азы азҵаара, аҧыза-министр ҿыц иаҭара ашьҭахь Аҳәынҭқарра Ахада ӡбатәыс иоуеит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа