Ажәабжьқәа

Популярное

Рауль Ҳаџьымба: аџьынџьуаа рганахь ала иҟалаз ацәгьоура зегьы ҳақәыӡбароуп

173
31.07.2018 15:54
Рауль Ҳаџьымба: аџьынџьуаа рганахь ала иҟалаз ацәгьоура зегьы ҳақәыӡбароуп
Аҧсны Аҳәынҭқарра Ахада Рауль Ҳаџьымба арепатриациеи ҳџьынџьуаа рнаплакы ақәлареи инарымаданы имҩаҧысыз инеиҵыхыз ауаажәларратә еизара далахәын. 

Аҟәа. Ҧхынгәымза 31. Аҧсныпресс. Лана Ҵәыџьҧҳа/Мадина Чагааҧҳа. Аҧсны аминистрцәа Реилазаара аҿы ауаажәларра рҧылара мҩаҧысит. Уи ихы алаирхәит Аҧсны Аҳәынҭқарра Ахада Рауль Ҳаџьымба. Аиҧылараҿы арепатриациеи ҳџьынџьуаа рнаплакы ақәлареи инарымаданы азҵаарақәа жәпакы ирылацәажәеит. 

Аиҧылара аартуа, Аҧсадгьыл ахь архынҳәразы аминистр Беслан Дбар 25 шықәса рыҩныҵҟа аҳәаанырцәынтәи ҳџьынџьуаа рыҧсадгьыл ахь рырхынҳәреи, аратәи аҧсҭазаара раршьцыларази аҳәынҭқарра иҟанаҵахьоу шмаҷым, арепатриациа азҵаарақәа рыӡбаразы комплексла азнеишьа шаҭаху, ауаажәларратә хеидкылақәеи апартиақәеи иҟалаз ацәгьоура ишақәҿырымҭыз, уҳәа инаҵшьны иазгәеиҭеит: “Ҳдиаспора ахаҭарнакцәа ҳҳәынҭқарраҿы имҩаҧысуа аҧсҭазаара иалахәуп. Иҟоуп апарламент адепутатцәа, еицырдыруа анаплакҩцәа, урҭ рхыҧхьаӡараҿы ақыҭанхамҩаҿы зылшамҭақәагьы маҷым ауаа. Ҳара ҳреиҷаҳароуп, ҳаҭырла арҭ ауаа ҳрызнеироуп”, – ҳәа иҳәеит Беслан Дбар.
 
Ахәҭакахьала, Аҳәынҭқарра Ахада Рауль Ҳаџьымба инаҵшьны иазгәеиҭеит: “Аҧсны Аџьынџьтәылатә еибашьра ианалага, ҳашьцәа ҧшрак ҳәа ҟамҵакәа, Ҭырқәтәылантәи иааит. Иҟан урҭ рахьтә ахәрақәа зауыз, иара убас иҭахақәазгьы маҷӡам. Ҳџьынџьуаа рҭоурыхтә ҧсадгьыл ахь рыхынҳәра-акыр шықәса раахыс иуадаҩу зҵаараны иқәгылоуп.

Иҟалаз ацәгьоура инадҳәаланы,ҳарҭ аӡәк иеиҧш ҳаицҿакны ӷәӷәала ҳақәыӡбароуп иҟалаз аус. Ари уажәаҧхьа иӡбатәын. Азинхьчаратә усбарҭақәа русура ауаажәларра рҟынтәи адгылара аиуроуп. Иабаҟаз ауаажәларратә хеидкылақәа, апартиақәа, аинтеллигенциа? Аӡәгьы ақәҿиҭуамызт, аҭагылазаашьа ахала аҽарҽеиуаз џьыршьон.

Зегьы ирдыруазароуп, даҽакала ари аус ӡбашьа амаӡам, азакәани Аконституциеи ирықәныҟәатәуп. Ари ацәгьоура иалахәыз зегьы рықәнага иақәшәароуп.

Ҳара ҳашьцәа рҵасқәа,  рқьабызқәа, рхатәы бызшәа еиқәдырхеит. Ари дара рџьынџь дгьыл ауп, дара рыҧсадгьыл ауп, уи зегьы ирдыруазароуп”, – ҳәа иҳәеит, Аҳәынҭқарра Ахада. 

Аҧсны абыргцәа рхеилак ахантәаҩы, Аҧсны Афырхаҵа Аполлон Шьынқәба Аҧсны абыргцәа реилазаара ахьӡала ҳтәыла анапхгара рахь ааҧхьара ҟаиҵеит.

“Иҟалаз ацәгьоура ҳарҭ зегьы ҳзызхәыцша хҭысуп. Ахара зду иқәнага дақәыршәатәуп. Сара ари ааҧхьара араионқәа рыҟны иҟоу абыргцәа зегьы рыхьӡала иҟасҵоит. Азинхьчаратә усбарҭақәа иаарласны ари аус аҭыҧ иқәырҵароуп, ацәгьоуцәа рыҧшаароуп. Аринахысгьы ҳашьцәа рганахьала ас еиҧш иҟоу ахҭыс бааҧс аҭыҧ амамзароуп”, – ҳәа азгәеиҭеит Аполлон Шьынқәба.

Аиҧылараҿы иара убас дықәгылеит Аҧсны Жәлар рпартиа ахантәаҩы Иақәыҧ Лакоба.

“Ҳара иазыхынҳәыз ҳашьцәа рлахьынҵа абас ала рыӡбара иақәызкыз ауаа иреиҳау ахара рыдҵазарц аҳәара ҟаҳҵоит”, – ҳәа иазгәеиҭеит иара.

Аиҧылара ахыркәшамҭазы уи иалахәыз зегьы,аҳәаанырцә инхо ҳдиаспореи ҳареи ҳаимадарақәа рырӷәӷәареи, иара убас иҟалаз ацәгьоура иҷыдоу ахылаҧшреи рыҭаразы атәыла анапхгара рахь ааҧхьара ҟарҵеит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа