Ажәабжьқәа

Популярное

Пицунда ақалақь аҿы аорҕантә музыка Жәларбжьаратәи Афестиваль аатит

129
13.09.2017 11:47
Пицунда ақалақь аҿы аорҕантә музыка Жәларбжьаратәи Афестиваль аатит
Аусмҩаҧгатә Пицундатәи аныхабаа аконцертә зал аҿы имҩаҧысит.

Цәыббрамза 13. Аҧсныпресс. Дырмит Басариа. Аиубилеитә V Жәларбжьаратәи афестиваль “Пицунда имҩаҧысуа аорҕантә хәылҧазқәа-2017” Пицундатәи аныхабаа аҳәынҭқарратә концертә зал аҿы имҩаҧысит. Ари аусмҩаҧгатә иаҭааит Аҧсны акультуреи аҭоурыхтә-культуратә ҭынхақәа рыхьчара аминистр Ельвира Арсалиаҧҳа, уи лхаҭыҧуаҩ Баҭал Кобахьиа, Аҧсны анаукатәии акультура усзуҩцәа, иара убас аҳаанырцәынтәи иааз амузыка абзиабаҩцәа.

Пицундатәи аныхабаа аҳәынҭқарратә концертә зал асцена аҿы афестиваль амҩаҧгара раҧхьатәи амш азы  иқәгылеит аорҕанрҳәаҩцәа Марина Шамба, Лука Гаделиа, Алексеи Семионов (Москва), Сергеи Будкеев (Барнаул), Владимир Хомиаков (Челиабенск), иара убас арфарҳәаҩы Елена Ҳагҧҳаи авокалист Кристина Ешбеи.

Афестиваль аартуа, аусмҩаҧгатә амҩаҧгаҩ Есма Џьениа уи ашьақәгылара аҭоурых далацәажәеит: “Афестиваль аҟазаара 5 шықәса ирылагӡаны, Аҧсны ахшыҩзышьҭра ду зырҭо хҭысны иҟалеит. Аха афестиваль ашьақәгылара аҭоурых акырӡа еиҳа аамҭа рацәа аҵанакуеит. Имҩаҧааго афестиваль, 1977 шықәса инаркны Леонид Роизман иаҧшьгарала имҩаҧысуаз аорҕантә музыка Жәларбжьаратәи афестиваль ишиашоу иадҳәалоуп. Убри аамҭа инаркны Пицундатәи аныхабаа аҿы есышықәса еиҧҟьарада, 1992 шықәсазы Аҧсны Аџьынџьтәылатәи еибашьра алагаанӡа имҩаҧысуан. Убас ала, сынтәа ҳара Пицунда аорҕантә музыка афестиваль мҩаҧысуеижьҭеи 40- шықәса аҵра азгәаҳҭар ҳалшоит”.

Ахәҭакахьала, Ельвира Арсалиаҧҳа инаҵшьны иазгәалҭеит: “Афестиваль аҿы рхы аладырхәуеит Урыстәыла, Европа атәылақәа рҟынтәи амузыкантцәа. Уи, акультура агеографиа аизолиациа аныҧшӡом, адунеи азы иаартуп ҳәа ауп иаанаго. Афестиваль есышықәса аҳәаақәа шарҭбаауа ала, уи алахәылацәеи аҧҵаҩцәеи аҩызцәеи рхыҧхьаӡарагьы еиҳа ишацло умбаратәы иҟам”.

(АП): Жәларбжьаратәи Афестиваль “Пицунда имҩаҧысуа аорҕантә хәылҧазқәа-2017” цәыббрамза 17 рҟынӡа имҩаҧыслоит. Афестиваль апрограмма аҿы иҟоуп Аҧсны, Урыстәыла, Европа аҟынтәи аорҕанрҳәаҩцәеи авокалистцәеи рықәгыларақәа.Аконцертқәа есыҽны, асааҭ 17: 00, 20:00 рзы .имҩаҧыслоит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа