Ажәабжьқәа

Популярное

Нодар Ҷанба: Аҧсны амузыкатә ҟазара Константин Ченгелиа ида ахаҿаагара уадаҩуп

123
22.05.2019 12:00
Нодар Ҷанба: Аҧсны амузыкатә ҟазара Константин Ченгелиа ида ахаҿаагара уадаҩуп
88-шықәса дшырҭагылаз иҧсҭазаара далҵит Аҧсны Аҳәынҭқарра Жәлар рартист Константин Ченгелиа.

Аҟәа. Лаҵарамза 22. Аҧсныпресс. Лана Ҵәыџьҧҳа. Иҧсҭазаара далҵит акомпозитор, “Ахьӡ-Аҧша” аорден III аҩаӡара акавалер, Аҧсны Жәлар рартист, Д. Гәлиа ихьӡ зху аҳәынҭқарратә премиа алауреат, 1992-1993 шш. Аҧсны Аџьынџьтәылатәи еибашьра аветеран, Аҧсны акомпозиторцәа Реидгыла ахантәаҩы  Константин Антон-иҧа Ченгелиа.

Аҧсныпресс акорреспондент диҿцәажәо, С. Ҷанба ихьӡ зху Аҧснытәи аҳәынҭқарратә драматә театр анапхгаҩы Хада Нодар Ҷанба, Константин Ченгелиа арҵаҩы, акомпозитор иаҳасабала дигәаларшәо иазгәеиҭеит: “Сара 5 акласс аҿы аҵара анысҵоз, Константин Антон-иҧа ахәыҷқәа ахор ахь рыдкыларазы ҳашкол ахь дааит. Усҟан уи слымҳа аҵарреи смузыкатә лшарақәеи ангәеиҭа, сҭаацәа рахь дцаны, усҟан иара напхгара зиҭоз Гәдоуҭатәи амузыкатә школ аҿы аҽазыҟаҵара салагарц азы драцәажәеит. Анаҩс, амузыкатә ҵараиурҭаҿгьы иара акомпозициа азы рҵаҩыс дсыман. Константин Ченгелиа ҳабиҧара иаҵанакуаз амузыкантцәа аӡәырҩы иааӡахьан. Уи аҧсуа культура аҿы илагала акырӡа идууп. Аҧсны амузыкатә ҟазара Константин Ченгелиа ида ахаҿаагара уадаҩуп. Гәалсра дула иҳадаҳкылеит ас еиҧш ауаҩы аамсҭашәа, апрофессионал ду дахьҳаҧхаз.

Константин Ченгелиа зегьы ргәалашәараҿы иҵоуроу ауаҩы лашаны даанхеит. Сара иара “аҧсуа Моцарт” ҳәа сишьҭан. Уи еснагьгьы апозитивра иныҧшуан, ауаа гәыкала ирзыҟаз уаҩҧсын”. 


(АП): Константин Ченгелиа хәажәкырамза 27, 1931 шықәса рзы, Гәдоуҭа араион, Калдахәара ақыҭан диит. Даныхәыҷыз аахыижьҭеи уи иаарылукааша амузыкатә ҟыбаҩ бзиа, алымҳа аҵарреи, амузыкатә-гәынгылара шьахә инубаалон. 

Аҧсны Аџьынџьтәылатәи еибашьараан Константин Ченгелиа еиҿикааз ансамбль “Аиааира” афронт ацәаҳәеи, арратә хәышәтәырҭақәеи  рҿы 102 концерт мҩаҧнагеит. Аибашьра амшқәа рзы иара 60 инарзынаҧшуа апатриоттә ҟазшьа змаз ашәақәа иҩит. Аиааира иасимволны иҟалеит ажәақәа Л.Тәанба авторс дызмаз “Аиааира” ашәа. К. Ченгелиа иара убас ихьӡ иадҳәалоуп Гәдоаҭатәи акультура Ахан аҿы иҟаз авокал-инструменталтә ансамбль “Рица”, иара убас Очамчыратәи акультура Ахан аҿы иҟаз авокал-инструменталтә ансамбль “Ерцахә”. 


Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа