Ажәабжьқәа

Мшаҧымза 9 рзы Аҧсны Аҳәынҭқарра Ахада Рауль Ҳаџьымба тҟәарчалаа рықалақь амш рыдиныҳәалеит

75
09.04.2019 10:55
Мшаҧымза 9 рзы Аҧсны Аҳәынҭқарра Ахада Рауль Ҳаџьымба тҟәарчалаа рықалақь амш рыдиныҳәалеит
“Иахьа Ҭҟәарчал ақалақьи Ҭҟәарчал араиони рҭагылазаашьа маҷ-маҷ аиҕьхара иаҿуп. Аҧсны анапхгара ирылшо зегьы ҟарҵалоит тҟәарчалаа рыбзазашьа шьаҭанкыла аиҕьтәразы”, – ҳәа иазгәеиҭеит Аҳәынҭқарра Ахада.

Аҟәа. Мшаҧымза 9. Аҧсныпресс. Аҳәынҭқарра Ахада Рауль Ҳаџьымба Ҭҟәарчал ауааҧсыра рықалақь амш рыдиныҳәалеит.

Адныҳәалараҟны, ҷыдала, иҳәоуп:

“Акыр иаҧсоу Ҭҟәарчалаа!

Гәык-ҧсыкала ишәыдысныҳәалоит итрадициатәу Ҭҟәарчал ақалақь Амшныҳәа! Ҳауаажәлар ибзианы ирдыруеит ҳақалақь-фырхаҵа аҭоурыхи, уи знысыз иуадаҩу амҩеи, Аҧсны ахақәиҭреи ахьыҧшымреи рзықәҧара аус аҿы тҟәарчалаа иаадырҧшыз агәымшәареи ртәы! Хашҭра ақәым 1989 шықәсазтәи ақырҭуа-аҧсуа еиҿагылараан Ҭҟәарчалаа рыҷкәынцәа рхымҩаҧгашьа ҕьеҩ!

Аҧсны Аџьынџьтәылатә еибашьраан амацәаз иҭакыз, аблокада иацыз амлакреи-ахьҭакреи зхызгаз, аха ақырҭуа агрессиа аҿаҧхьа шьаҿакгьы ихьамҵыз Ҭҟәарчал ауааҧсыра ирылшеит ҳтәыла зегьы азы астратегиатә ҵакы ҷыда змаз аплацдарм аиҿкаара. Ақалақь ахьчаҩцәа – хьӡырҳәагақәа рымчала иаҧҵаз Ҭҟәарчалтәи аполк архәҭақәа рылахәын Мрагыларатәи афронт еиуеиҧшым ажәыларатә операциақәа. Рыхьӡ кашәара ақәымзааит зыҧсадгьыл зхы ақәызҵаз ҭҟәарчалаа рҵеицәа – еиҿамсқәа!

Иахьа Ҭҟәарчал ақалақьи Ҭҟәарчал араиони рҭагылазаашьа маҷ-маҷ аиҕьхара иаҿуп. Ахаҿра рҿыцуп ақалақь ацентр, ирыгу-ирыбзоу ҟаҵахоит Ҭҟәарчалтәи ахәышәтәырҭа, аџьармыкьа, егьырҭ асоциалтә обиектқәа. Хҭыс дуны иҟалеит ақалақь агәҭаны Аҧсны Аҳәынҭқарра Актәи Ахада Владислав Арӡынба ибаҟа ахьаартхаз, агәцаракра ҷыда ахьаиуз уи ихьӡ зху амҩаду. Инагӡахоит Бедиатәи амҩа аиҭашьақәыргылара иазку апроект. Аҧсны анапхгара ирылшо зегьы ҟарҵалоит ҭҟәарчалаа рыбзазашьа шьаҭанкыла аиҕьтәразы.

Ишәзеиҕьасшьоит агәамч ҕәҕәа, агәалаҟара бзиа, аманшәалара, ҧхьаҟатәи аихьӡара ҿыцқәа”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа