Ажәабжьқәа

Популярное

Москва ақалақь аҿы имҩаҧысит ансамбль “Амцабз” аҳасабырбатә концерт

1122
02.05.2018 14:51
Москва ақалақь аҿы имҩаҧысит ансамбль “Амцабз” аҳасабырбатә концерт
Аусмҩаҧгатә акәашара Жәларбжьаратәи амш иадҳәалахеит.

Аҟәа. Рашәарамза 2. Аҧсныпресс. Дырмит Басариа. Аҧсуа жәлар рыкәашара азы Москватәи ахәыҷтәы ансамбль “Амцабз” аҳасабырбатә концерт Москва ақалақь аҿы имҩаҧысит. Аконцерт рхы аладырхәит еицырдыруа амузыкатә нагӡаҩцәа, иара убас, Кавказ ажәларқәа рыкәашаратә ансамбльқәа. Аусмҩаҧгатә акәашара Жәларбжьаратәи амш иадҳәалахеит. Абри атәы Аҧсныпресс ахь адырра ҟаиҵеит ансамбль “Амцабз” ахореограф, асахьаркыратә наҧхгаҩы Лаша Марыхәба. 

Ансамбль “Амцабз” ақәҿиарақәа дрылацәажәо Лаша Марыхәба иазгәеиҭеит: “Ҳара ҳансамбль аҧҵара аамҭа инаркны иахьа уажәраанӡа, аҿиареи арепертуар аҳәаақәа рырҭбаареи иаҿуп, еиеиуеиҧшым москватәии жәларбжьаратәии афестивальқәеи рҿы ишьахәны ахы аанарҧшуеит, имаҷымкәа ахраҿақәеи аҳамҭақәеи раиура алнаршахьеит. Иахьазы ансамбль “Амцабз” иалоу ахәыҷқәа рхыҧхьаӡара 90-ҩык рҟынӡа инаӡоит. Урҭ зегьы еиуеиҧшым амилаҭқәа рхаҭарнакцәа роуп, қәралагьы 4-шықәса инаркны 15 шықәса рхыҵуеит. Ари аҳасабырбатә концерт кавказтәи акәашаратә ҟазара зҳарҵо ахәыҷқәа рҭаацәа рзы еиҿкаан". 

Аиубилеитә хәылҧазы аконцертә программа иалалеит еицырдыруа аҧсуа музыка анагӡаҩцәеи, иара убас, Кавказ ажәларқәа рыкәашаратә ансамбльқәеи рықәгыларақәа: Урыстәылатәи Афедерациа аҿы иҟоу Ермантәыла Ацҳаражәҳәарҭа аҟны иҟоу ахореографиатә ансамбль “Вардананк”; аҧснытәи апроект “ApsnyStar” афиналистка Рамина Задеи; ашоу “Голос-дети” алахәыла, аконкурс “Детская Новая Волна-2016” алауреат, ашәаҳәаҩ Милена Барцыц; жәлар рыкәашаразы Москватәи ансамбль “Адыги”; аопертә шәаҳәаҩы Беслан Сымсым; амузыкатә проект “Apsny Star” аҿы аиааира згаз Саида Агрба; ашоу “Ты супер!” аҿы аиааира згаз Лера Адлеиба, уҳәа аӡәырҩы.  

Лаша Марыхәба иажәақәа рыла, 2015-2016 шықәсқәа рзы ари аколлектив афестиваль “Гордость Москвы” 4 етапк рҿы “Инагӡаны аиааира згаз” ҳәа аҳаҭыртә хьӡы анашьахеит. 2017шықәса рзы –140-тәи Аиубилеитә Жәларбжьаратәи афестиваль – ахәыҷқәеи ақәыҧшцәеи рҟазаратә конкурс “Бегущая по волнам” аҿы аиааира агеит. Мшаҧымза, 2017 шықәса рзы – ансамбль алахәылацәа Жәларбжьаратәи афестиваль “Феерия танца” аҿы I аҩаӡара алауреатра азы адипломқәа ранашьахеит. Жьҭаарамза 2017 шықәсазы – Жәларбжьаратәи афестиваль “Танцы без границ” агран-при аиуит. Ажьырныҳәамза 2018 шықәсазы ансамбль “Амцабз” – Жәларбжьаратәи аконкурс “Art open World” аҿы аиааира агеит, иара убас ашьапылампыл азы Адунеи Ачемпионат аартра алахәхаразы алҧшааратә тур ахраҿа агеит. Уимоу, мызкы аҧхьа, хәажәкырамзазы, ансамбль, ахореографиа азы Иаарту Москва Ахраҿа агара аҿы 1-тәи аҭыҧ азы х-храҿак аиура алшеит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа